Link açıqlığı

Saatnıñ esas haberi

Aksönovnıñ saray delileri


Künlerde «Regionlar klubı» federal ekspertler ağı ve Milliy davalarnı ögrengen Merkez tarafından tertip etilgen «Rusiye regionlarında «Nefret salqımları» milletlerara zıddiyet reytingi. Baar-küz 2014 senesi» neticeleri belli etildi.

Nezaret etüvniñ malümatına binaen, «Qırım Cumhuriyeti» - milletlerara zıddiyet yüksek seviyede olğan bir regiondır. «Milletlerara zıddiyet ep devam etmekte. Vaziyet nezaret astından çıqması mümkün», – dep netice çıqaralar ekspertler.

Amma, Kremlge uyğun tedqiqat neticeleri rusiyeli Qırım yolbaşçısı Sergey Aksönovnı çorlandırdı, çünki metinde «bir çoq dava vaqiaları» aqqında söz yürütile, «akimiyet» ise, bam-başqa şeyler aqqında bildire.

«Bu arqadalarğa kimdir bu kibi tedqqatnı azırlamağa vazife berdi, sanki bizde zıddiyet yüksek seviyede olğanını ayttırdı. Amma, bu delilerniñ deli laflarıdır», – dedi Aksönov oktâbrniñ 17-nde ATR telekanalında ötkerilgen canlı yayın devamında.

Aytqanına köre, tedqiqat «ğarpnıñ mahsus hızmetleriniñ sımarışı», tedqiqat üzerinde çalışqan ekspertler ise, «grant qullanıcıları» ve «aqıldan tayğan deliler» dedi.

Men meraqlanıp başladım: Aksönovnıñ sözlerine köre, Qırımda iç bir vaqıt olmağan ekspertler kim eken?

Reyting saytı böyle malümat berdi:

1. Aleksandr Formançuk, «Qırım Cumuhuriyeti» Cemaat palatası reisi muavini, Qırım ekspertler klubınıñ reisi;

2. Vadim Petrov, tarih ilimleri namzeti, «Qırım Cumhuriyeti» Nazirler Şurası yanında ekspertler-analitik şurasınıñ azası;

3. Viktor Afanasyev, siyasiy ilimler namzeti, Tabiat qoruvı ve kurort qurucılığı milliy akademiyasında içtimaiy-gumanitar ilimleri ve çetel tilleri kafedrasınıñ dotsenti;

4. Viktor Harabuga, tarih ilimleri namzeti, «Qırım Cumhuriyeti» reisi yanında Ekspert klubınıñ azası;

5. İvan Abajer, «Qırım Cumhuriyeti» Cemaat palatasınıñ azası, Paisiy Hilendarskiy adına bulğarlar cemiyetiniñ reisi;

6. Natalya Kiselöva, siyasiy ilimler namzeti, «Qırım Cumhuriyeti» Nazirler Şurası yanında ekspert-analitik şurasınıñ azası, «Qırım Cumhuriyeti» Cemaat palatasınıñ azası;

7. Nikolay Küzmin, felsefe ilimleri namzeti, «Qırım Cumhuriyeti» Nazirler Şurası yanında ekspert-analitik şurasınıñ azası, Qırım ekspert klubınıñ vekili.

Birinci kere, Aksönovnıñ aytqanları doğru dep, onınen razım, çünki yuqarıda añılğan episi ekspertler bir sıra etnik, diniy hurafelerniñ saipleridir, em de yapqan «tedqiqatları» da bunıñ isbatıdır.

Faqat, qırımtatarlarğa qarşı yapılğan repressiyalar közge alınsa, reytingniñ çıqarğan neticeleri menim iç duyğularımnı akis ete.

Anatoliy Beketov, qırımlı mühbir, siyasiy közetici

«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG