Link açıqlığı

Saatnıñ esas haberi

Aqmescitteki yol omravı aqibetinde elâk olğanlarnıñ adları belli oldı


Aqmescit civarında aylanma yolunıñ omravı neticesinde yüz bergen yol qazasında eki qırımtatar qorantasınıñ azaları can berdiler. VAZda eki aileniñ azaları buluna ediler – Keriç ve Aqmescitten. Olar Aqmescit rayonınıñ Bulğanaq (Kolçugino) köyünden toydan qayta ediler, dep bildire 15 minut saytı.

Yol qazasında vefat etkenler:

Eskandarov İbrail, d.t. 1980 senesi – aydavcı.

Eskandarova Zarema, d.t. 1981 senesi.

Asan E., üç yaşında.

Muslim E., üç yaşında.

Salimova Asiye, d.t. 1977 senesi.

Aliye S., 16 yaşında.

Yol qazasında zarar körgenler:

Serim S. d.t. 2013 senesi.

Levida S. d.t. 2002 senesi.

Agentlikniñ malümatına köre, ad ve soydalarında hatalar olması mümkün.

Sayt bergen malümatqa köre, VAZnıñ artından kelgen aqyarlı nomeralar ile Renault maşinası çuqurğa tüşmedi. Maşinanıñ bir köpçegi aralıqqa tüşip ketti. Aydavcı zarar kördi. Havfsızlıq yastıqları çalıştı.

Bu arada QHA agetligi bildire ki, facia qurbanları Eskenderovlar ve Salimovlar qorantaları oldılar. Maşinada birinci aile başı Ayder Eskenderov, onıñ apayı ve eki balası-egizler bar ediler. Bundan ğayrı, maşinada apayınıñ doğmuş qardaşı, Asiye Salimova, ve onıñ dört balası kettiler. Eki bala sağ qaldı.

Salimovlar Yedi Quyu rayonınıñ Qıdırlez (Voykovo) köyündendir.

Elâk olğanlarnıñ cenaze merasimi bugün, saat 12.00, «Abdal» mezarlığında keçirilecek.

Qırım.Aqiqat bergen malümatqa binaen, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.

Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.

Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.

XS
SM
MD
LG