Link açıqlığı

Saatnıñ esas haberi

#StopCrimeanTatarGenocide: Kiyevde aktsiya keçirildi


Kiyev – Ukrain paytahtınıñ cemaatçılığı işğal etilgen Qırımda qırımtatarlarğa qarşı alıp barılğan siyasetke nisbeten munasebetini bildirdi. Cuma aqşamı künü, sentâbrniñ 25-nde Rusiye Federatsiyasınıñ Kiyevdeki elçihanesi yanında mahsus aktsiya ötkerildi. Uquq qorçalayıcılar, teşebbüsçiler, lâqayd qalmağan kiyevliler qırımtatarlarnıñ sıqıştıruvı ve repressiyalarnı toqtatmağa talap ettiler.

«Qırımtatarlarnı mart ayından başlap bugünki künge qadar sıqıştıralar. Tünevin ATR telekanalı ekstremistik faaliyetinde qаbaatlanğan edi. İşğalci akimiyetniñ Qırımnıñ tamır halqına qarşı yapılğan repressiyalarnı toqtatqanını isteymiz. Qırımtatar tili ve medeniyeti yarımadada serbest inkişaf etkenini isteymiz», – dep añlattı tetbir tşkilâtçısı, teşebbüsçi Tatyana Bezruk.

Tedbirniñ başında iştirakçiler qırımtatarlarnıñ sıqıştıruvlarını tasdiqlağan cedvelni oqudılar. Cedvelde insanlarnıñ öldürüvi, ibadethanelerniñ aqaretlevi, medreselerde ve iş adamlarnıñ evlerinde tintüvler, Meclis ve halq reberleriniñ Qırımğa kirişniñ yasağı kibi vaqialar qayd etile.

İştirakçiler elçihane qapusı yanında şu cedvelden alınğan faktlar aydınlatılgan albom kâğıtlarını qaldırdılar. Bunen beraber, olar «ATR-ni tiymeñiz», «Reşat Ametov rusiyeli işğalcilerniñ qolundan elâk oldı», «#StopCrimeanTatarGenocide» kibi yazılarnı tuta ediler. Ekseriyeti qırımtatar bayraqları ve diger milliy timsallerni alıp ketirdiler.

Aktsiyada uquq qorçalayıcılar ve qırımlı köçebelerni birleştirgen teşkilât azaları iştirak ettiler. Vostok-SOS teşebbüsiniñ koordinatorı Konstantin Reutskiy Qırım.Aqiqatqa bildirgeni kibi, ukrain cemaatçılığı küçü olğanı qadar Qırımda yaşağan ukrain vatandaşlarına destek köstermeli.

«Mart ayında Qırım işğal etilgen vaqıtta, biz anda yaşağan ukrain vatandaşlarnıñ menfaatlarını qorçalamaq içün pek az areket ettik. Şimdiki vaqıtta, Qırımda sıqıştırılğan ukrain vatandaşlarnıñ, hususan qırımtatarlarnıñ meselelerine köz yummaq doğru degil, dep sayam»,– dedi uquq qorçalayıcı.

Qırım-SOS teşebbüsiniñ koordinatorı, tedbir iştirakçisi Tamila Taşeva qayd etkeni kibi, narazılıq aktsiyasını keçirmek içün yañlış yer seçildi. Aytqanına köre, rusiyeli diplomatlarğa muracaat etmek mantıqsızdır, çünki Rusiye yolbaşçıları cemaatçılıqnıñ fikirlerine çoq qulaq asmaylar. Taşeva qayd etkeni kibi, Qırımnıñ tamır halqına destek köstermeleri içün daa çoq halqara teşkilâtlarğa ricada bulunmaq kerek edi.

«Qırımtatarlar - Qırımda işğalge qarşılıq köstergen eñ büyük cemaatçılıqtır. Qanunsız saylavlardan ğayrı, Qırım parlamenti yarımadağa saip çıqqanlarını köstermege istediler. Amma, kerçek saipler - qırımtatarlar olğanını biz bilemiz»,– dedi teşebbüsçi.

Elçihaneden bir kimse çıqmadı. Şimdiki vаqıtta bina tamirge qapalı, aktsiya ötkerilgen vaqıtta Rusiye diplomatlardan iç biri onıñ içinde yoq edi.

XS
SM
MD
LG