Qırımda oyun zonasınıñ teşkil etilüv tertibatı bu seneniñ soñuna qadar azır olacaq. 2015 senesi ise işbu leyha amelge keçirilecek. Bunı İTAR-TASSqa Qırımnıñ öz başına tayin etilgen baş nazir Sergey Aksönov bildirdi.
«2015 senesi leyhanı amelge keçirecekmiz. Oyun zonasınıñ tertibatı ise bu seneniñ soñuna qadar tayin etilecek. Bir vaqıtları dünyanıñ çeşit köşelerinde oyun zonalarını teşkil etken mütehassıslarnıñ fikirlerini ögrenemiz ve bu tecribeni Qırım cumhuriyetinde amelge keçirmege areket etemiz», – dey Aksönov.
Onıñ sözlerine köre, al-azırda muzakere etilecek tehnikiy-iqtisadiy añlatuv azırlana.
«Şimdi cezalarnıñ kirsetilmesi ile bağlı bazı meselelr bar, oynamağa istegen adam çoq, amma esasen – çetel vatandaşları. Eminim ki, olar Qırımda özlerini oñaytlı duya bilecekler», – dep yekün çekti o.
Rusiye prezidenti Vladimir Putin işğal etilgen Qırımnı oyun zonalarınıñ olması mümkün olğan regionlarnıñ sırasına kirsetecek qanunnı imzaladı. Mütenasip qanun iyül 23 künü aşkâr etildi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
