Bugün Qırımnıñ «spiker muavini» Remzi İlyasov qırımtatarlarğa yarımdada sentâbrniñ 14 künü keçirilecek saylavlarğa kelmege muracaatı ile bulundı.
İlyasovnıñ beyanatı «Yedinaya Rossiya» qırım regional bölüginiñ saytında yerleşe.
İlyasov beyanatında qırımtatarlarnıñ milliy añı ğayet yüksek olğanını qayd ete ve işbu küç qaysı tarafqa yönelecegi qırımtatar siyasetçilerine bağlı olğanını bildirdi.
«Ziddiyetlerge alıp ketirgen çıqış yollarnı aylanıp keçmelimiz. Olar tek vatandaşlarnıñ tarihiy Vatanına qaytuv ve abadanlaştıruvını qıyın ete bile. Biz dialognı seçmelimiz, barışıq, tınç inkişaf yolunı, em de federal akimiyet, cumhuriyet yolbaşçılığı qırımtatarlarnıñ meselelerini çezmege azır olğanını kösterdi»,– dey İlyasov.
O, qırımtatarlarnı «ikmet ve tolerantlıqnı köstermek, macera ve konfrontatsiyalardan çetleşmege» çağırdı.
«Biz Qırımnıñ, ükümetniñ siyasiy ayatında iştirak etmelimiz. Bu maqsat ile qırımtatarlar akimiyette olmalı…», – dedi İlyasov ve «diger yol – belgisizlik» olğanını qoşıp ayttı.
Hatırlatamız, Qırım «Devlet şurası»na küz saylavlarını boykot etmege qarar alğan qırımtatar milliy Meclisi Remzi İlyasov, Zaur Smirnov ve Teyfuk Gafarovnıñ qırımtatarlarnıñ temsiliy organında azalığını vaqtınca toqtattı.
Soñ qarar qırımtatarlarnıñ Qurultayında alınacaq.
