Link açıqlığı

Saatnıñ esas haberi

Mecliste Türkiye onıñ vatandaşlarını Qırımdan quvulğanına riayet etecegini bekleyler


Aqmescit – Mecliste Türkiye Cumhuriyeti onıñ vatandaşı İsmet Yükselniñ Qırımğa yiberilmegenine keskin riayet etecegini bekleyler. Yüksel Meclis reisiniñ Türkiye ile munasebetler boyunca mesleatçısı ve QHA informatsion agentliginiñ reberi ola.

Meclisniñ tış alâqalar bölügi reberi Ali Hamzinniñ fikirince, bu mesele Türkiye ükümeti seviyesinde baqılmalı.

Ali Hamzin Qırım.Aqiqatqa bergen izaatında: «Er devlet öz vatandaşlarını qayğıruvınen ayırıla. Misal içün Amerikanı alayıq, vatandaşları telükeli bir alğa tüşseler ya da aqlarını bozsalar, birden qorçalamağa ıntıla. Atta, Rusiye, onıñ vatandaşları telüke astında qalğan devletke birden ordularnı kirsetecegi aqqında qanun qabul etti», – dep ayttı Hamzin.

Meclis vekili İsmet Yükselge 5 yılğa kiriş yasaq etilgenine menfiy qıymet kesti.

«Bu kibi şekilde, halqlarğa beslenilgen nefret, rus ealisini qayğıruv ve diger sebepler uydurıp, Aksönov qırımtatarlar toplu yaşağan qasabalarnı sürgün ete bile. Bu Moskvanıñ qararımı, ya da Aksönovnıñ teşebbüsimi añlaşılay. Aksönovnıñ qararı ya da Moskvanıñ olsun o ep bir qanunsızdır», – dedi Hamzin.

Ekspert: Türkiye Rusiyenen munasebetlerni bozmaycaq

Ankaradaki iqtisadiyat ve tehnologiyalar universitetiniñ halqara munasebetler fakultetiniñ dotsenti Torgul İsmail, Türkiyeniñ munasebeti Rusiyeniñ ilerideki adımlarına fayda ketireceginde şübelene. Ekspertniñ fikirince, bu vaqia eki devlet arasındaki munasebetlerge tesir etmeycek.

Aynı zamanda, Togrul İsmail qayd etkeni kibi, İsmet Yükselge kirişniñ yasaqlanuvı «kereksiz ve mantıqsız», dep saya. «Bu kibi yasaqlar, akimiyetniñ dava çıqarmağa ıntılğanını köstere, tatarlar ise, özlerini qolda tutıp, doğru alıp baralar. Meclis, reberleri adına separatizm ve ya fanatizm kibi öpkeler, bazı qırımtatarlarnıñ satılğanı, aırımtatar cemaatçılığı arasında bölünüv – bunıñ episi Qırımnıñ şimdiki akimiyeti dialognı qurmaycağını köstere», – dep añlattı mütehassıs.

İsmet Yükselniñ apayı, Meclis azası Gayana Yüksel, Qırım.Aqiqatqa bildirgeni kibi, onıñ aqayı Türkiye ükümeti ve elçihanesine muracaat etti, ve halqara qurum ve mahkemelerine de ricada bulunacaq.

Bu vaqiağa endi Ukrainanıñ Türkiyedeki elçihanesi seslendi

«Şimdiki vaqıtta Pütinniñ qurumı qırımtatarlarğa nisbeten, kütleviy sürgünlikniñ sebepçisi ve biñlerce adamlarnıñ ölümine ketirgen, sovet totalitar usullarını qullanmağa devam ete. Biz türk tarafını ve bütün halqara cemaatçılığını Rusiye Federatsiyasınıñ qırımtatarlarğa qarşı alıp barğan siyaseti ve aqlarnıñ bozuluvını mahküm etmege çağıramız», – dep aytıla Ukraina elçihanesiniñ bildirmesinde.

Matbuat vastalarınıñ malümatına köre, türkiy tilli memleketlerniñ mühbirler Halqara Birligi İsmet Yükselge Qırımga kelmege yasaq etilgeni sebebinden öz memnüniyetsizligini bildirip, cemaatçılıqnı Qırım mühbirlerine qol tutmağa çağırdı.

Evelden haber etilgeni kibi, avgustnıñ 9-nda qorantasınen Türkiyeden qaytqan vaqıtta İsmet Yükselge Qırımğa kelmege yasaq ettiler.

Şu künü Türkiyede Ankara şeerinde rus elçihanesi yanında qırımtatar diaspora vekilleri narazılıq aktsâisını ötkerdiler.

Avgustnıñ 12-nde. Qırımnıñ öz başına tayin etilgen başnaziri Sergey Aksönov bu yasaqnı izaatlap, «milletlerara davanı açtırmağa ıntılğan er kim» Qırımğa yiberilmeycegini bildirdi.

Ukraina halq vekili, qırımtatarlarnıñ lideri Mustafa Cemilev Aksönovnıñ izaatını «ahmaqlıq» dep adlandırdı.

İsmet Yüksel – cemaat erbabı, bir sıra gumanitar leyhalarnıñ teşebbüsçisi ve reberi, şu cümleden, Türkiye diasporasınıñ desteginen Qırımda bala ve yaşlar içün ötkerilgen leyhalarnı teşkil etti. Meclis reisiniñ Türkiye ile münsebetlerde mesleatçısıdır. Qırımda - Qırım Haberler Agentliginiñ teşkilâtçısı. Onıñ apayı Gayana Yüksel QHA-nıñ baş müdiri ve Meclis azasıdır.

Bundan evel, qırımtatarlar lideri Mustafa Cemilev ve Meclis reisi Refat Çubarovnı yarımadağa yibermediler.

XS
SM
MD
LG