Link açıqlığı

Saatnıñ esas haberi

Alış-veriş ve saylavlar mevzusında fikirler


Ali Özenbaş
Ali Özenbaş

Devlet şurasına ve yerli organlarğa saylavlarda iştirak etmek ya da etmemek meselesini Qurultaynıñ kün tertibine kirsetmek mantıqsız, çünki Meclis bu aqta qararnı kendi aqları çerçivesinde qabul etti.

12.06.2014 senesi qabul etilgen Meclisniñ qararı bir sıra sualler doğursa bile, onı talil etmege de sebep yoq.

Elbette, qararnıñ yazılğan şekili biraz uyğunsız, yani akimiyet kvota berse, saylavlarda iştirak etecekmiz, yoq dese, yoq. İşte, bu qusur bir sıra namussız adamlarnı akimiyetke sıqı bağlanmaq içün teşviq ete. Belki de namus ne olğanını da iç bir vaqıt bilmegendirler.

Er zaman akimiyetke qoşulmazdan evel, «halqqa hızmet etmek», «halqnıñ meselelerini çezmek», «halqqa yardım etmek» kibi deliller ketirile edi. Amma, bu «maqsadlar» kendi menfaatlarnıñ qorçalanuvına çevirilgeni ve boşboğazlıq olğanı körünip tura. Misal içün, Stepanov degil de, nasıldır Memetov halqnıñ bir de bir ciddiy meselesinen oğraşqanı içün o al etilgeni aqqında iç bir vaqıt eşitmegen edim.

Adlarnı mahsus aytmayım. Ayırı şahıslarnı teñqid etmek istemeyim. Mesele şunda ki, akimiyet organlarında halqımıznıñ 5 ya da 5 biñi bulunsa bile, esas davamız – milliy kelecegimiz, devletçiligimiz, yerleşüv ve abadanlaştıruv meselelerni temelden çezip olamazlar. Amma, ayat köstergeni kibi, ayırı şahıslar akimiyetke qoşulğan soñ, kendi ve soylarnıñ meselelerini çezip olalar.

Bu «fedakârlıq» ekseriyetniñ narazılığına sebepçi ola ve er zaman olğanı kibi, bu sefer de, bölünüv içün esas olur. Bunıñ teşebbüsçileri de, tamam şu bölünüvnen er kesni qorquzalar.

Kerçekten: qırımlı repatriantlarnıñ angi meselesini vekillerimiz Rusiye esabına çezip oldılar? Cevapnı tapalmağanlar, öz seçimini aqlayaraq, Qurultay ve onıñ milliy organlarını teñqid eteler.

Akimiyetni maqtap, bülbül kibi sayramaqtan başqa çareleri qalmay, em de soñki eki ay içinde bir sıra vesiqalarnıñ qabul etilüvi, qırımtatar siyasetçilerniñ olarnı yerine ketirmek içün çalışmaları, adamlarğa añlatmaları ve ilâhre….

Çünki, «23 yıl devamında Ukraina qırımtatarlar içün bir yapmayıp, tek saylavlarda qullanğan». Yani, olarnıñ fikirince, Milliy Meclis diger teşkilâtlarnen birlikte qırımtatarlarğa yüz bergen deñişmelerniñ ne derecede güzel olğanını añlatıp yürmeli.

Qırım Cumhuriyeti milletlerar ve sürgünge oğratılğan grajdanlarınıñ meseleleri boyunca komitet reisi, ne sebepten ale daa Meclis reisi muavini dep, özüni tanıttıra? O devletke hızmet etip başlağanınen, bu vazifeden boşatıldı, resmiy olaraq onı Qurultay bu vazifeden marum etecek, onıñ yerine ise, başqası saylanacaq.

Çünki Mecliske bağlı olmasa edi, akimiyetke kerek olmaz edi. Başqalarnıñ da vaziyeti şu. Bu sebepten, olar içün Meclis ve Qurultaynıñ saylavlarğa çağırmaları müim.

Tamır halqnıñ kütleviy şekilde saylavlarda iştirak etüvi, ve atta vekillerniñ saylanmaması ep bir devletniñ işinde iştirak etüvini kösterecek. Yani, halqımız tarafından yüz bergen deñişmelerni adaletli sayıp, qabul etüvini numayış etecek.

Demek, Qırımnıñ statusı boyunca ötkerilgen referendumda qullanılıp, Rusiye Federatsiyasınıñ uyğunsız, demokratiyağa ters kelgen saylav sistemasını közge alaraq, biz bu saylavlarda iştirak etmemelimiz.

Ali Özenbaş, milliy areket iştirakçisi

«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG