Aqmescit – Meclis reisi muavini Nariman Celâlnıñ fikirince, 2014 senesiniñ soñunda Qırım ealisiniñ cedvelge aluv tedbirlerinde qırımtatarlar faal iştirak etmeliler.
Qırım.Aqiqatqa izaat bererek, Nariman Celâl: «Qırım federal vilâyeti» boyunca ealiniñ cedvelge qayd etilüvi ğayesi Mecliste muzakere etilmedi. Biz Mecliste qırımtatarlarnıñ sayısını belgilemekni çoqtan tüşüngen edik, amma esaplarımız bu bayağı masraflı tedbirler olğanını kösterdi, onıñ içün yardımsız kendi küçümiz ile bunı yapamaycağımıznı añladıq», – dedi.
Mecliste qırımtatarlarnıñ sayısı tahminen 300-den 350 binğni teşkil etkenini tüşüneler. Amma, bu raqam doğrumı ya yoq – belli degil.
«Bu cedvelge aluv tedbirleri açıq ve doğru ötkerilmesi pek müim. Eñ esası – neticeler bizge belli etilmeli. Çünki, sovet zamanlarında çeşit millet vekillerini başqa halq temsilcisi kibi kösterile edi, qırımtatarlarnı asılında ayırı millet olaraq közge alınmay edi», – dedi Celâl.
Soñki kere Bütün Ukraina boyunca ealiniñ qayd etilüvi 2001 senesi ötkerilgen edi. «O vaqıt neticege irişmedik, qırımtatarlarnıñ sayısı aydınlatılmadı», - dep qayd etti Meclis reisi muavini.
Aynı zamanda, Nariman Celâl, akimiyet qırımtatarlarnıñ sayısını azlaştırıp köstermege isteycegini istisna etmey. «Küçük sahtecilikler de yapıla bile. Ve bu yañlış malümatlar akimiyet içün elverişli, halqımız içün aksine zararlı olur», - dep qayd etti o.
Hatırlatamız, evelden Rusiye Federatsiyasınıñ ükümeti 387 million ruble ayırıp, «Qırım federal vilâyetinde» ealiniñ cedvelge aluvına azırlıqnıñ ve tedbirniñ keçirilüvini avale etti.
