Kreml tarafından tayin etilgen Qırım ükümetiniñ yolbaşçısı Sergey Aksönov Rusiyeniñ mimariy-şeer qurucılıq şurasından işğal etilgen yarımadanıñ butün territoriyalarına ait esas planlarnıñ tasdıqlanmasını talap etti. Öz talabını Aksönov Aqmescitte keçken rusiye şurasınıñ toplaçuvında bildirde, dep bildire «RİA Krıım».
“Yıl soñuna qadar bizim esas vazifemiz bütün territoriyalarnıñ bütün esas planlarını tasdıqlamaqtan ibaret, çünki öz nevbetinde bu mesele bizim işimizni qolaylaştırıp, mimarlarnı işten azat etip, kereksiz bürokratiyadan qurtulmamızğa ve raat çalışmamaızğa imkân doğuracaq”, - dep ayttı Aksönov.
Aksönovnıñ sözlerine köre, uzun bir muddet devamında, işğal etilgen Qırımnıñ şeer qurucılığı teşkerilmegen.
Arpelniñ 24-nden itibaren Aqyarda şeernin yañı esas planı muzakere etilmekte. Kreml nezareti altındaki ükümetniñ emirine binaen, ealiniñ tanışması içün şeerniñ bütün rayonlarında tanıtuv stendleri açılğan. Eki künlük tanıtuv kampaniyası devamında hatırlatma kitaplarında yüzlernen Aqyar sakini öz qaydlarını yazıp taşlağan. Şeer sakinleriniñ çoqusı esas plandan memnün degiller. Aqyar sakinleri memnüniyetsizlik bildirmesiniñ esas sebebi – şeer territoriyasını zonalarğa bölüvdeki serbest areket etilmesidir.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
