Rusiye Devlet Dumasınıñ deputatı, Rusiyeniñ Qırımdaki sabıq prokurorı Natalya Poklonskaya Qırımda içtimaiy qabulhane açmağa istegeni aqqındaki meramını bildirdi. Bu aqta Poklonskaya aprelniñ 21-nde özüniñ Facebook saifesinde haber etmekte.
Onıñ aytqanlarına kore, qabulhanesi Kezlevde yerleşecek, açılışı da mayısnıñ 4-de yapılacaq eken.
«Qabul içün evelden yazılmağa acet yoq. Devlet Dumasında çalışıp başlağanımdan berli bu menim doquzıncı qabulım olacaq... Kezlevdeki şahsiy qabul künlerim artıq muntazam sürette yapılacaq ve bizler bu aqta üç kün evel haber etmege tırışacaqmız. Diger zamanlarda qabulhanemde menim yardımcılarım çalışıp maña yollanacaq muracaatlarnı qabul etip turacaqlar», – dep qayd ete Poklonskaya.
Natalya Poklonskaya aytqanına kore, Rusiye Devlet Dumasına saylânğandan berli eki biñden ziyade vatandaş ve teşkilât muracaatına cevap bergen eken.
«Prokuratura organlarından kelgen soratmalar neticesinde 100-den ziyade qanunsız protsessual qarar lâğu etilgen, dört dane cinaiy iş qozğatılaraq, taqiq işleri devam etmekte, qanunsız areket ve vatandaşlarnıñ aq-uquqı bozuluvına prokuror cevabı olaraq 28 dane vesiqa teslim etilgen. Ondan ğayrı, prokurorlar tarafından imtiyazlı kategoriyadaki vatandaşlarnıñ mesken ev alma aqqı tiklenmesi içün üç dane ariza berilgen», - denile muracaatta.
Devlet Dumasına yapılğan yedinci çağıruv saylâvları 2016 senesi sentâbrniñ 18-nde Rusiyede ve işğal etilgen Qırımda keçirilerek, Ukraina ve Ğarp memleketleri tarafından keskin tenqit etilgen edi. ABD, Kanada, Fransa, İsveç, İngiltere, Almaniya, Çehiya, Türkiye kibi bir sıra devletler istilâ altındaki Qırımda keçirilgen saylâvlarnı qanunsız dep tanıdı.Poloniya Tışqı işler nazirligi Rusiyeniñ Devlet Dumasına yapılğan parlament saylâvlarnıñ umumen qanunğa uyğun şekilde keçirilgeninden şubelenmekte. Sentâbrniñ 20-nde Ukraina Yuqarı Şurası işğal etilgen Qırımdaki saylâvlarnıñ qanunsız keçirilgeni ve Rusiye Devlet Duması yedinci çağıruv terkibiniñ umumen qanunsız olğanınen bağlı qarar qabul etti.
