Link açıqlığı

Gaagadaki Birleşken Milletler Halqara mahkemesiniñ Rusiyeni işğal etilgen Qırımda Ukraina vatandaşları aqlarınıñ bozulmasını toqtatmasına, şu cümleden Qırımtatar Milliy Meclisiniñ yasağını lâğu etmesine mecbur etmek qararınıñ qırımtatarlar içün büyük maneviy emiyeti bar.

Böyle bir fikirni qırımtatar halqınıñ lideri, Ukraina halq deputatı Mustafa Cemilev Qırım.Aqiqatqa izaat berip seslendirdi. Bunıñnen beraber, o, Rusiye mahkeme talaplarına uyacağından şübelengenini bildirdi.

«Yoq, onıñ (mahkeme talaplarına – QA) riayet etecegi yoq. Lâkin, nasıl olsa da, Gaaga mahkemesiniñ bu qararı pek emiyetlidir. Taqiplerge oğrağan qırımtatarlar içün maneviy bir destek. Şübesiz. Olar anda (Rusiyede – QA) bir qarar aldılar, bir şeyni begenmeseler, olar, rusiyeliler, oña riayet etmeycek. Böyle bir yaramazlıq belli bir müddet daa devam etecek. Amma kene de qayd etem, bizim içün bu müim bir qarar», – dep qayd etti Cemilev.

Birleşken Milletlerniñ Halqara mahkemesi işğal altındaki Qırımda Ukraina vatandaşlarınıñ aq-uquqlarını qorçalamaq içün «Ukraina Rusiyege qarşı» davası boyunca muvaqqat tedbirlerini kirsetmege razı oldı. Bunı aprel 19-da Gaagadaki açıq diñlevlerde mahkeme reisi Ronni Abraham bildirdi.

Mahkeme ukrainlerniñ aq-uquqlarına ketirilgen zarar deliller bar olğanını tasdıqladı.

Böylece, mahkeme Rusiyeden Meclis faaliyetini yasaq etmek qararı ile qırımtatar halqınıñ menfaatlarını temsil etmesi mevzusında aq-uquqlarınıñ bozulmasını toqtatmağa ve işğal etilgen yarımadada ukrain tilinde tasil berilmesini temin etmekni talap etti.

Yanvar ayında Ukraina BM Halqara mahkemesinde Rusiyeni terrorizmge maddiy destek köstermesine qarşı Halqara añlaşma ve er türlü ırqiy ayırımnıñ yoq etilmesi boyunca Halqara añlaşmalarını bozğanında qabaatlap, oña qarşı dava açtırdı. Mart başında Birleşken Milletlerniñ Halqara mahkemesinde dava baqılmasınıñ birinci basamağı ile bağlı açıq diñlevler yekünlendi.

Ukraina Gaagadaki Halqara mahkemeden Rusiyege qarşı iş baqılacaq vaqıtta muvaqqat tedbirlerniñ alınması aqqında rica etti. Bu çareler sırasında – Rusiyeniñ «Ukrainada vatandaşlarğa qarşı terrorizm areketlerini yapqan taqımlarğa» maddiy ve diger destek bermesini toqtatmaq, ve bu taqımlarğa artıq böyle areketler yapmamaları içün tesir etmesini, em de Qırımda diskriminatsiyadan vazgeçmege, ayrıca, Qırımtatar Milliy Meclisi ve onıñ faaliyetini yasaq etmemesini ve ğayıp olğan qırımtatarlarnıñ taqiqatını alıp barmasını talap etmek.

Rusiye Qırımnı zapt etken soñ Donbasta silâlı çatışma devam ete, onıñ neticesinde, BM malümatına köre, aman-aman 10 000 insan elâk oldı. Ukraina ve Ğarp, Rusiyeni separatistlerge qoltutqanı ile qabaatlaylar. Kreml bunı inkâr etip, Donbassta Rusiye «göñüllileri» bar ola bile, dep bildire.



XS
SM
MD
LG