Rusiye Federatsiya Şurasınıñ spikerı Valentina Matviyenko bir sıra senatorlarnen birlikte Rusiye Devlet Dumasına yañı qanun leyhasını teklif etti, o Qırım Hanlığınıñ Rusiye İmperiyasına qoşulğanını yañı hatıra künü olaraq belgilenmesini tasdiqlay. Bu aqta aprel 14 künü Rusiye Federatsiya Şurasınıñ matbuat hızmeti bildire.
«Askerlik şan-şüreti ve Rusiye hatıra künleri» Rusiye federal qanunına deñişmeler kirsetecek qanun leyhasına köre, yañı bayramnı aprel 19 künü qayd etmege teklif eteler.
Qanun leyhasınıñ müelliflerinden biri, evel ise Qırım Muhtar Cumhuriyetinde deputat olğan Sergey Tsekovnıñ sözlerine köre, II Yekaterina imzalağan Manifest – qomşu Rusiyeniñ tarihında «müim vaqıya edi».
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
