İşğal etilgen Qırımda Bağçasaray rayon mahkemesi, aprel 13 künü tintilgen eki qırımtatarına dair qarar aldı. Bunı Facebookta Qırımtatar Milliy Qurultayınıñ MSK reisi Zair Smedlâyev haber etti.
Onıñ bergen malümatına köre, Seydamet Mustafayevni 12 künge apis ettiler, Midat Mujdabayevni – 3 künge qapattılar.
Daa bir mahkeme aprel 14 künü keçirilip, Seydamet Mustafayevnen bağlı olacağı haber etile.
Smedlâyev: «Bügün saat 9.00 Bağçasaray rayon mahkemesinde Seydamet Mustafayevni mahküm etecekler. Onı yanvar 26 künü Seyran Saliyevte tintüv ötkerilgende teşkil olunğan mitingke qoşulğanında qabaatlaylar. Mahkemeci – Koşelev. Advokatlar bu qararğa itiraz bildirmege niyetliler», – dep qoştı.
Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler. Sekiz qırımtatarı tutılğanı aqqında haber etile edi.
Soñra Bağçasaray rayon mahkemesi tutılğan bazı musulmanlarğa dair qarar çıqardı: olarğa para cezası ve apis etüvler tainlendi.
Rusiye uquq qoruyıcıları Qırımdaki tutuvlarnı «planlaştırılğan tedbirler» dep adlandırdı.
Qırım Muhtar Cumhuriyetiniñ prokuraturası Bağsaraydaki bu tintüv ve tutuvlarğa dair cinaiy iş açtı.
Ukraina Tışqı işler naziligi, dünya cemaatına muracaat etip Qırımda tintüvler sıqlaşqanı sebebinden Rusiyege basqını küçlendirmege çağıracağını bildirdi.
Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
