Link açıqlığı

Saatnıñ esas haberi

Bağçasarayda tutulğan musulmanlarnı mahkemege alıp keteler – advokat


Aprel 13-de saba Bağçasarayda yaqalanğan Qırım musulmanlarına nisbeten memuriy protokollar tizildi, olarnı mahkemege alıp keteler. Bunı qırımlı advokat Cemil Temişev Riza Mujdabayevniñ evinde keçirilgen tintüvden soñ bildirdi.

«Er yerni baqıp çıqtılar, eki telefon, sistema bloku, eki flaş kartı, bir kitapnı aldılar. Memuriy cinayet aqqında prokotol tizildi, mahkemege alıp keteler. Er kes mahkemege kele bile, biz anda yol alacaqmız», – dep ayttı advokat.

«Kremlniñ Qırım siyasiy mabüsleri» saifesinde haber etildi ki, tutulğan insanlarğa qoltutacaqlar Bağçasaray mahkemei ögünde toplaşa.

Rusiye uquq qoruyıcıları tintüv ve tutuvlarnı şimdilik izaatlamadı.

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler.

Aprel 6-da OMON hadimleri Aqmescitniñ merkeziy bazarını sarıp alğan edi. Rusiye uquq qoruyıcıları «slavân körünişi olmağan» 80-ge yaqın insannı tuttı. Qırımdaki Rusiye politsiyasınıñ idaresi Aqmescit çarşısındaki tutuvlarnı «planlaştırılğan iş tedbirleri» dep adlandırdı.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG