Link açıqlığı

Oquşqa qolay başlamaq: işğal etilgen topraqlarnıñ abituriyetleri ukrain tasiline bir adım daa yaqın oldı


Kyiv mektebiñde soñki çañ bayramı, 2016 senesi mayıs

İşğal etilgen topraqlarnıñ mektep talebeleri içün ukrain attestatını alma ve derske kirmeyip imtian berme işleri qolaylaştırıldı. Bunı «Açıq siyaset» fondunıñ icra müdiri İrina Jdanova bildirdi. Abituriyentlerge de bütün kerekli vesiqalarnı bermege acet yoq. İşğal etilgen Qırım ve Donbass studentleri oquş başlağanından üç ay içinde eksik şeadetnamelerni teslim ete bileler.

İşğal etilgen Qırım ve kontrol etilmegen Donbass topraqlarınıñ mezunları aliy oquv yurtlarına qolaylaştırılğan esnastan keçip kire bileler, dep bildirdi İrina Jdanova. Ukraina tasil nazirligi buña dair buyruqnı qabul etti.

«Donetsk vilâyetiniñ tasil departamentiniñ vekilleri tünevin bildirdi ki, Donetsk vilâyetinde vaqtınca kontrol etilmegen topraqlardan 600-den ziyade bala tışqı mustaqil imtianlarğa qayd oldı», – dep ayttı Jdanova.

İrina Jdanova

İrina Jdanova

Jdanovanıñ bildirgenine köre, kontrol etilmegen topraqlarda oquğan balalar içün uzaqtan tasil programmaları azırlandı.Bu programmalarnıñ yardımı ile kontrol etilmegen topraqlarda berilmegen derslerni, ukrain mektebiniñ fenlerini, talebeler özleri ögrene bileler.

Programma, iş tertibi ve talap etilgen vesiqalar aqqında malümatnı abituriyentler ve ana-babaları Tasil nazirligi ve «Qırım – Ukrainadır» ve «Donbass-Ukrainadır» tasil merkezleriniñ saytlarında tapa bileler. Bundan ğayrı, separatistler «gov.ua» domenlerini blok etse, «Dostupna osvita» saytı açıldı. Anda qayd olmayıp, oquş programmaları ve bütün malümatnı almaq mümkün.

İşğal etilgen topraqlardan balalarnıñ oquşqa başlaması içün qolaylaştırılğan mehanizmi peyda oldı, dep ayta Ukraina tasil ve ilim nazirligi aliy tasil departamentiniñ müdiri Oleg Şarov.

Abituriyentler Ukrainadaki aliy oquv yurtlarınıñ tasil merkezlerinde imtian bermeli. 12 merkez açılğan edi. İmtian bergen mezunlar tasil vesiqasını alıp, kolej, tehnikum ya da aliy oquv yurtuna qolay kire bileler.

Oleg Şarov

Oleg Şarov

«Bu yıl bütün merkezler sentâbr 19-30 künleri çalışacaqtır. Bu şekilde universitetke kirmege mümkün olur. Bizge Ukraina vatandaşı kele, amma bütün vesiqaları yoq, imtianlarnı berip aliy oquv yurtuna kirmege imkânı bar, soñra ise üç ay içinde eksik vesiqalarnı ketire bile», – dep ayta Şarov.

İşğal etilgen topraqlardan balalarnı orta ve aliy tasil almağa celp etmemiz pek müimdir, dep ayta vaqtınca işğal etilgen topraqlar ve memleket içinde köçip kelgenlerniñ meseleleri naziriniñ mesleatçısı Yuriy Grımçak.

Devlet bu meselelerni baqsa, vesiqalarnen bağlı bütün suallerniñ cevabı tapıla

«Devlet bu meselelerni baqsa, vesiqalarnen bağlı bütün suallerniñ cevabı tapıla. Devlet olaraq bu insanlarnı celp etmelimiz, Ukraina kelecegine ve azat etilecek topraqlarnıñ kelecegine güzel bir yatırım yapamız», – dedi Grımçak.

Keçken sene, Haber siyaseti nazirliginiñ statistikasına baqılsa, Donetsk ve Lugansk vilâyetleriniñ işğal etilgen topraqlarından üç biñden ziyade bala ukrain attestatını aldı. Faqat memurlar bile umumiy miqdarnıñ küçük bir fayızı olğanını ayta. Kontrol etilmegen topraqlarda oquğan ve keçken sene Ukraina aliy oquv yurtlarına kirecek olğan balalarnıñ ana-babaları «Donbass.Realii» saytına aytqanlarına köre, blok noqtalarından keçmek zor, amma ukrain ocaları ve mektep reberleri uzaqtan imtian bermege ve test yazmağa yardım ete ediler.

Radio Svoboda

Metinniñ asıl nushası – Radio Svoboda saytında

XS
SM
MD
LG