2017 senesi mart 1 künü ilk esaplarğa köre, Aqyar sakinleriniñ sayısı 429 815 insannı teşkil etti ve yılnıñ başından 1062 insanğa arttı. Bu aqta «Krımstat» matbuat hızmeti bildire.
«Keçken seneniñ yanvar-fevral aylarına nisbeten, Gagarin rayonından ğayrı bütün rayonlarda doğuv seviyesi azlaştı. Gagarin rayonında 1000 insanğa doğuv sayısı 12,6 olsa – 13,0 qadar arttı. Gagarin rayonında eñ çoq bala doğuldı (2017 senesi yanvar-fevralde bütün doğğanlardan 40,6%). Doğuv seviyesiniñ umumiy koifitsienti 1000 sakinge 11,2 teşkil etti ve 2016 senesi yanvar-fevraldekine baqqanda azca edi (11,7)», – dep haber etile.
2017 senesi yanvar-fevralde ölgenlerniñ sayısı 1025 insannı teşkil etti (keçken sene aynı müddetke nisbeten 12 insanğa çoqça), qayd eteler müessisede.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
