Link açıqlığı

Kreml kontrol etken Qırım Yuqarı mahkemesiniñ binası yanında maskalı belgisiz şahıslar Belâl Adilovnı yaqaladı, dep bildire Qırım.Aqiqat mühbiri.

Adilov mabuslarnıñ azat etilmesi içün dua oquğan edi.

Adiseni videoğa çıqarğan şaatnıñ telefonını atıp, Adilovnıñ özüni mikroavtobusqa mindirip alıp kettiler. Soñki malümatlarğa köre, yaqalanğan insan Qırımdaki Taqiqat komitetiniñ Rusiye idaresinde buluna.

Advokat Emil Kürbedinovnıñ bildirgenine köre, Adilov Rusiye Ceza kodeksiniñ 318-inci maddesi boyunca qabaatlana – akimiyet vekiline qarşı zorbalıq ya da telüke qullanması.

«Adilov, vatandaş faali, mahkeme oturışlarına diñleyici olaraq keldi. Aqmescit civarındaki tintüvler vaqtında diger faallerniñ yanında edi!», – dep yazdı Qırım advokatı Emil Kürbedinov Facebook saifesinde.

Qırım Rusiye kontroli altına keçken soñ yarımadada FSB jurnalist, advokat, cemaat erbabı ve qırımtatarlarnı sorğuğa çekip, evlerinde tintüvler keçire.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı kösterilmesini toqtatmağa çağırdı.

XS
SM
MD
LG