Kreml kontrol etken Qırım Yuqarı şurasınıñ mahkemesi Qırımtatar Milliy Meclisiniñ reis muavini Ahtem Çiygoznıñ davasından prokuror çetleştirilmesini red etken soñ imayeniñ daa bir qaç muracaatını baqmadı: Ahtem Çiygoznıñ mahkeme salonına ketirilmesi, davağa halqara aq qorçalayıcılarnıñ 2014 senesi fevral 26 vaqialarına dair maruzasınıñ ilâve etilmesi ve mahkeme erkânınıñ davadan bütünley çetleştirilmesi. Bunı advokat Nikolay Polozov Facebook saifesinde yazda.
Mart 27-de olıp keçken toplaşuvda imaye şaatı Lemmar Yunusovnıñ ifadeleri alındı. Onıñ aytqanına köre, «Ahtem Çiygoz bir de bir işaret köstermedi ve miting iştirakçilerine emir bermedi». Bundan soñ mahkeme imayeniñ ekinci şaatı Seyran Egamberdiyevni sorğuğa çekti. Faqat iş vaqtı bitkeninden onıñ sorğusı yekünlendi.
Salı künü, mart 28-de, diñlevler devam etecek, dep bildirdi Polozov.
Bundan evel Qırım Yuqarı mahkemesi Ahtem Çiygoznıñ apis müddetini üç ayğa, iyül 8-ne qadar uzatqan edi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
