Kyivde mart 17-de taqdim etilecek «Mustafa Cemilev. Mazun olmağan» kitabı qırımtatar halqınıñ lideri Mustafa Cemilevni dissident olaraq degil, Qırımnı işğalden azat ettirmege tırışqan küreşçi olaraq tasvirlemekte. Bunı kitap müelliflerinden biri Sevgil Musayeva Qırım.Aqiqatqa aydınlattı.
«Bu tercimeiyal degildir. Ekinci müellif Alim Aliyev ile bugünki vaziyette tercimeiyal yazmaq doğru olmağanını añladıq. Bizim içün Cemilevni belli bir dissident olaraq köstermeknen beraber Qırımnı işğaldeg azat ettirmek içün yapqan areketlerini aks ettirmek pek müim edi», – dep ayttı Musayeva.
Onıñ qayd etkenine köre, kitap sekiz babdan ibaret, er biri – işğalniñ eki yılı devamında Mustafa Cemilev ile körüşüvidir.
«Birinci körüşüvimiz işğalden bir ay keçken soñ Hodorkovskiyniñ forumında olıp keçken edi, kitap Jamalanıñ Eurovision ğalebesinen yekünlene, Mustafa Cemilev onı qoltutmağa kelgen edi», – dep bildirdi müelliflerden biri.
Kyivde mart 17-de «Mustafa Cemilev. Mazun olmağan» kitabı taqdim etilecektir. Müellifleri «Ukrainskaya pravda» baş muarriri Sevgil Musayeva-Borovik ve «KrımSos» cemaat teşkilâtınıñ esasçılarından biri Alim Aliyev olalar.
Oquyıcılarğa kitap «Knijnıy arsenal» halqara festivalinde taqdim etilecektir.
Mustafa Cemilev – qırımtatarı, SSCB zamanınıñ ve Ukrainanıñ siyasiy ve cemaat erbabıdır. Qırımtatar milliy areketiniñ reberlerinden birisi, uquq qorçalayıcı, dissidentler areketininiñ iştirakçisi, siyasiy mabus, Ukraina halq deputatı, 2014 senesi avgust 20-den başlap Ukrana prezidentiniñ qırımtatar halqı işlerinden vekâletlisidir.
2014 senesi mart 20-de Ukraina Yuqarı Radası qırımtatarlarnı Qırımnıñ tamır halqı olaraq tanıdı. Bu qararğa 283 deputat rey berdi. Ukraina qırımtatar halqınıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmektedir.
