Keriç boğazından keçek köpürniñ leyhası yapılğanda, alimler şu regionda zelzele ihtimalını 10-dan 8,5 baağa qadar eksiltken ediler ve bunen qurucılıqqa yol berdiler. Amma öyle neticeler professional degil ve qazağa ketirmek mümkün. Öyle fikirni mart 22 künü Qırım.Aqıqat Radiosınıñ saba efirinde Vernadskiy adına TMU Cografiya institutınıñ müdiri Dmitriy Nikolayenko bildirdi.
«Köpür – 20 kilometrlik mesafedir. Zelzele ihtimalını 20 faizğa tüşürdiler. Ola bilecek aqibetler büyük qazağa ketirmek mümkün. Büyük muendislik inşaatı olacaqta, ekspertler toplaşa da özüni ayaqçılar kibi alıp bara. Qaveqanege kelseñiz, bir şey sımarlaysız, ayaqçı kele ve soray: «ne istersiñiz?», bu ekspertlerniñ davranmasında yañı standart oldı. SSCB-de bile öyle degil edi», – dedi Nikolayenko.
Keriç boğazında köpür qurucılığı aqqında Rusiye prezidenti Vladimir Putin Qırım işğalinden soñ birden ilân etti. Köpürni 2018 senesine qadar qurmağa, 2019 senesi yazda ise çalıştırmağa vade ettiler. İyül başında «Krımskiy most» haber merkezi Keriç boğazındaki Rusiyeden Qırımğa köpür qurucılığınıñ fiyatı 227,92 mlrd ruble teşkil etkenini bildirgen edi.
Bundan evel Rusiye ükümeti Keriç boğazındaki köpürniñ demir yol qısmınıñ vaqtınca açılmasını bir yılğa qaldırdı – 2018 senesi dekabr ayından 2019 senesi dekabr ayına. Ukraina tarafı 2014 senesi Qırım işğalinden soñ Rusiye ile köpür qurucılığı añlaşmasından ayırıldı.
