Link açıqlığı

Polozov «Ümerov davasında» şaat statusına avuştırılmasından Avropa mahkemesine şikâyet etecek ola


Nikolay Polozov, arhiv fotoresimi

Nikolay Polozov, arhiv fotoresimi

Advokat Nikolay Polozov Qırımtatar Milliy Meclisiniñ reis muavini İlmi Ümerovnıñ imayecisi olamay, çünki onıñ davasında şaat sayıla. Faqat ileride Kreml kontrol etken Qırım mahkemesiniñ onı şaat statusına avuştırmaq qararından Avropa insan aqları mahkemesine şikâyet etecek ola. Bunı o salı künü, mart 21-de, Qırım.Aqiqat mühbirine aydınlattı.

«Şimdi Aqmescitniñ Kiyev rayon mahkemesi itiraz qararınıñ kopiyasını berecegini bekleyim. O vaqıt Avropa insan aqları mahkemesine muracaat etmege mümkün olur. Men taqiqatçınıñ areketlerinden de şikâyet ettim, amma bu ariza daa baqılmadı. Böylece, şimdilik şaat olıp qalacam. Amma bunı nafile yapalar. Men er şeyni añlatırım: qaçırılğanımnı, yapılğan basqını», – dedi Polozov.

Onıñ bildirgenine köre, «Ümerov davasınıñ» taqiqatı yekünlendi ve eñ yaqın vaqıtta qabaat qararı prokuraturağa berilmeli. «Bir qaç künde belli olur», – dedi advokat.

Polozovnıñ tahmin etkenine köre, mahkeme İlmi Ümerovnı apiske almaycaq: «Er şey köz ögüne alınsa, şartlı apis cezası ya da para cezası olacaqtır. Şartlı olsa – olarğa daa qolay, er ay kelip qayd olmalı ve kontrol altında qalacaq».

Kreml kontrol etken Qırım Yuqarı mahkemesi fevral 14 künü advokat Nikolay Polozovnıñ Aqmescitteki Kiyev rayon mahkemesiniñ mahkemecisi Viktor Mojelânskiyniñ Rusiye FSB taqiqatçısı İgor Skripkağa onı «Umerovnıñ davasında» şaat olaraq sorğuğa çekmege ruhseti sebebinden bergen şikâyet arizasını red etti.

Birinci instantsiya mahkemesiniñ qararı deñştirilmedi. Böylece, Qırımnıñ Yuqarı mahkemesi yanvar 25-de Polozovnıñ FSB hadimleri tarafından yaqalanmasını qanunğa uyğun dep tanıdı.

Polozovnıñ «Umerov davasından» ayırılması mahkeme toplaşuvlarınıñ ketişatına tesir etmesi mümkün. Böyle bir fikirni qırımtatar milliy areket iştirakçisi İlmi Umerov seslendirdi.


XS
SM
MD
LG