Link açıqlığı

Kreml kontrol etken işğal altındaki Qırım Yuqarı mahkemesi mart 21-de «Çiygoz davasında» imaye tarafınıñ birinci şaatı Qırımtatar Milliy Qurultayı Merkeziy saylav komissiyasınıñ reisi Zair Smedlâyevni sorğuğa çekecektir. Bunı Ahtem Çiygoznıñ advokatı Nikolay Polozov Qırım.Aqiqatqa haber etti.

«Zairden başlaycaqmız. Qabaatnıñ birinci qısmı – 25-de cinayet planınıñ tizilmesidir, bizge bütün malümatlar kerek, Zairniñ ise haberi bar. O, Meclis qurulışını ve içindeki munasebetlerni bile. O, Çiygoz bir de bir cinayet planını tizdimi-yoqmı añlatacaq. Belki de, onıñ qarandaş ile oturıp, bir şeyler sızğanını kördi?», – dep qayd etti Polozov.

Advokatnıñ bildirgenine köre, 50-den ziyade insan imaye tarafınıñ şaatı olmağa istedi.

«Qabaat qararında olğan şaatlarımız çoq degil. Taqiqatnıñ bunıñ kibi tanığan şaatlarnı sorğuğa çekip, başqalarnı da davet etecekmiz. Sayısı qararnen aynı olsun kerek, amma mahkeme buña nasıl baqar, bilmeymiz: bu şaatlarnı çağırmağa keder etecekmi-yoqmı. Qanunğa köre böyle bir aqqı yoq», – dep qoştı Çiygoznıñ imayecisi.

Onıñ aytqanına köre, mahkeme bütün şaatlarnı sorğuğa çekmege izin berse, esnas daa bir qaç ay sürer.

«Yazma delillerimiz de bar. Dinamikada nasıl olacağına baqacaqmız», – dep ayttı Polozov.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.


XS
SM
MD
LG