Link açıqlığı

UTH Qırımnı ziyaret etken Sırbistanlı ve Çehiyalı siyasetçilerine 5 yılğa devletke kirişini yasaq etti


Sırbistan parlamentiniñ deputatı Milovan Bojić Aqmescitte, Qırımnıñ Rus akimiyet vekillerinen körüşkende

Sırbistan parlamentiniñ deputatı Milovan Bojić Aqmescitte, Qırımnıñ Rus akimiyet vekillerinen körüşkende

Ukraina telükesizlik hızmeti Kreml nezaretindeki Qırım akimiyetiniñ daveti ile yarımadanı ziyaret etken dört Sırbistanlı ve bir Çehiyalı siyasetçige 5 yılğa devletke kirişini yasaq etti. Bunı mart 20 künü Ukraina telükesizlik hızmetiniñ matbuat kâtibi Yelena Gitlânska haber etti.

Gitlânskanıñ Facebookta yerleştirgen bildirüvinde: «Ukraina telükesizlik hızmeti, Avropa ve başqa memleketlerden işğalci akimiyetniñ davetinen «sahte referendumnıñ» üçünci yıllığında Qırımnı ziyaret etken siyasetçiler aqqında malümatını teşkerdi. Qırım MC toprağında dört Sırbıstan vatandaşı ve bir Çehiya vatandaşı ruhsetsiz bulunğanları ortağa çıqtı. UTH olarğa Ukrainağa kirişini beş yıl müddetinen yasaq etti», – dep aytıla.

«Delegatsiyada Ukraina vatandaşları bar olğanı aqqında malümat şimdige qadar tasdiqlanmadı», dep qoştı Ukraina telükesizlik hızmetiniñ matbuat kâtibi.

Bundan evel rusiyeli haber vastaları çetelden ve Ukrainadan siyasetçiler eyyeti Qırımnı ziyaret etkenleri aqqında haber etken edi.

Ukraina Milliy telükesizlik ve mudafaa Şurasınıñ kâtibi Aleksandr Tusçinov çetel ve ukrain siyasetçiler taqımınıñ azalarına qarşı sanktsiyalar kitsetilmek kerek olğanını bildirdi, Ukraina telükesizlik hızmetini Avropa ve diger memleketlerden kelgen siyasetçiler, em de «ukraina vatandaşları» tarafından Qırımnı qanunsız şekilde ziyaret etkenleri aqqında malümatnı teşkermege ve soyadlarını bermege çağırdı.

Ukraina Tışqı işler nazirligi bundan evel, çetel eyyetleriniñ Qırımğa yapqan ziyaretleri resmiy sayılmağanını beyan etken edi. Ukrain nazirligi iyül 25-de muracaatını aydınlatıp, çetel vatandaşları ve vatandaşlığı olmağan insanlarnı Qırımnı qanunsız usulnen ziyaret etmekten vazgeçmege çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG