Çonğarda telekommunikatsion qulleniñ açılğanınen yarımadada qalğan qırımlılarnen Ukraina üç tilde laf etecek – qırımtatarca, ukraince ve rusça. Bunı Qırımtatar Milliy Meclisiniñ reisi Refat Çubarov bildirdi, dep haber ete Ukrinform.
«Bir çaremiz bar, öz halqımıznen ana tilinde esas Ukrainadan laf etmek. Bizim içün bu pek müim. Qırımdaki insanlarnen üç tilde laf etecekmiz – qırımtatarca, ukraince ve rusça», – dep ayttı Çubarov.
O, «bu qulleden ATR telekanalı, Meydan radiosı, Lider radiosı ve digerleri Qırımğa yayın yapa bilsin dep, taraflar içün belli formulalar tapılacağına» ümüt etkenini ayttı.
Mart 17-de Çubarov dedi ki, Herson vilâyetinde Geniçesk rayonınıñ Çonğar qasabası yanında qurulğan teleradio qullesi – yarımadanı Ukraina kontroli altına qaytaracaq müim bir adım.
Cuma künü, mart 17-de, Qırım ile memuriy sıñır civarındaki Çonğar qasabasında teleradio qullesiniñ tantanalı açılış tedbiri olıp keçti. Onı Rusiye işğal etken yarımadağa ukrain telekanalları ve radioları yayın yapsın dep qurdılar.
