Link açıqlığı

Mart 16 künü Ukraina Nazirler Şurasınıñ toplaşuvında, işğal etilgen topraqlardan sürgün etilgenlerler şu topralar azat etilgeninden soñ üç yılnıñ içinde öz mülkünü keri ala bilecekleri aqqında qanun leyhası qabul olundı. Bunı Ukraina İçtimaiy siyaset nazirliginiñ matbuat hızmeti bildire.

«Sürgün olunğan ve mülkü tutıp alınılğan şahıslar, eger mülkü Ukrainanıñ vaqıtınce işğal olunğan ya da terroristlerge qarşı arbiy areketler alıp barılğan yerlerde bulunsa, mezkür yerlerde Ukraina qanunları kene amelge keçkeninden soñ üç yıl devamında zararnıñ ödenilmesi ve mülkü keri qaytarılması içün, ariza yaza bilirler», – dep haber etile.

Sürgünlik sebebinden alınılğan bina ve diger mülkni insanlarğa keri qaytarmaq ya da zararnıñ ödenilmesi aqqında Ukraina qanunınıñ 7-ci maddesi bütünley yerine kelmegeni sebebinden bu teşebbüs çıqtı, dep qoştılar müessisede.

«Rusiye Qırımnı zapt etkeni, Donetsk ve Lugansk vilâyetlerinde terroristlerge qarşı küreş alıp barılğanı içün devlet akimiyet organları bu yerlerde öz vazifesini eda etip olamay. Bu sebeplerden, Nazirlikniñ teşebbüsinen Ukraina qanunlarınıñ 7 maddesine böyle deñişmeler teklif etildi, akimiyet ise destekledi », – dep bildireler matbuat hızmetinde.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG