Ukraina baş naziri Volodımır Groysman mart 14-de Ankarada «Qırım işğaliniñ yıllığına bağışlanğan fotoserginiñ açılışında iştirak etti», dep bildire ukrain ükümetiniñ matbuat hızmeti.
Onıñ qayd etkenine köre, «1000 künden ziyade ukrain Qırımı Rusiye Federatsiyasınıñ işğali altında buluna».
Bu müddet içinde «acayip ukrain kurortı Rusiye istilâcısı tarafından askerleştirildi, anda din, demokratiya, azatlıq aqqı bozula», – dep qayd etti Volodımır Groysman.
Ukraina baş naziri qayd etti ki, Ukraina Türkiyeniñ onıñ topraq bütünligi ve mustaqilligine qoltutqanına büyük emiyet bere.
«Bilemiz ki, ukrain Qırımı Ukranağa qaytarılacaq. Adalet, qanun ğayrıdan tiklenecek. Bu bizim borcumız ve ğalebedir», – dep ayttı Volodımır Groysman.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
