Ukrainanıñ Rusiye ile munasebetleri asğarğa yetmeli, bu devlet Avropa Birligi tarafından istilâcı olaraq tanıldı. Bunı Ukraina halq deputatı, Qırımtatar Milliy Meclisiniñ reisi Refat Çubarov Qırım.Aqiqat radiosınıñ yayınında ayttı.
Böylece o, Ukrainanıñ Rusiye ile diplomatik munasebetlerini bozma ihtimalini izaatladı.
«Al etecek eñ eyi yol – orta bir şeydir. Men Rusiye ile istilâcı devlet olaraq munasebetlerni asğarğa yettirmege çağıram. Ukrainanıñ ğayreti sayesinde de bu memleket Birleşken Milletler Teşkilâtı Baş assambleyasınıñ 2016 senesi dekabr 19 künü rezolütsiyasında istilâcı memleket olaraq tanıldı. Böylece, Rusiyege nisbeten areketlerimiz buña esaslanmalı», – dep ayttı Çubarov.
Meclis reisiniñ qayd etkenine köre, Ukraina memleket ortaqları içün işğal etilgen Qırım ve Donbassnıñ işğal etilgen topraqları meselelerini «bir formulağa» birleştirmeli.
«Cenk vaziyeti ya da bir de bir diger statusnıñ ilân etilmesine baqqanda Ukrainanıñ istilâcı memleket ile munasebetlerniñ belgilenmesi daa aktualdir. Bu formula Qırım ve şarqiy Ukrainanı birleştirmeli. Bu formula böyle olmalı: Ukraina topraq bütünligi halqara seviyede tanılğan sıñırlarda, Qırım Muhtar Cumhuriyeti ve Aqyar şeerinen beraber ğayrıdan tiklenmeli. Bu formula tışında birisinen muzakere masasına oturmamalımız», – dep qayd etti Çubarov.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
