Link açıqlığı

FSB ukrain uquq qorçalayıcılarına kiriş noqtasınıñ fotoresimini çıqarğanları içün para cezasını berdi


Qırım ile memuriy sıñırda Rusiye uquq qoruyıcıları tarafından yaqalanğan ukrain uquq qorçalayıcıları «sıñır nizamını» bozğanları içün para cezasını aldı, dep bildire mart 13-de Qırım ükümetiniñ «ruporı» «Krıminform» Qırımdaki Rusiye FSB sıñır idaresiniñ matbuat hızmetiniñ malümatına esaslanıp.

Berilgen malümatqa köre, üç Ukraina vatandaşı memuriy sıñırdan maşinanen keçip, «Rusiye kiriş-çıqış noqtasına taba foto ve video çıqara edi».

«Rusiye kiriş-çıqış noqtası tarafında foto ve video çıqarıp, yolcular maşinağa mindi ve keri qaytmağa tırıştılar», – dep aytıla haberde.

«Yaqalanğanlar ukrain kiriş-çıqış noqtasınıñ işini nezaret etmege kelgenlerini bildirdiler, lâkin video delilleri bozğunlıqlar olğanını isbatlay. «Uquq qorçalayıcılarğa» qarşı Rusiye Memuriy bozğunlıq kodeksiniñ 18.1 maddesiniñ 1-inci qısmı boyunca memuriy protokol tizildi. Bu maddeniñ eñ büyük cezası beş biñ Rusiye rublesini teşkil ete», – dep qayd ete Rusiye hızmeti.

Mart 13-de yaqalanğan ukrain uquq qorçalayıcıları şimdilik bir de bir izaat bermedi.

Mart 13-de aqşam Ukrain ombudsmeni kâtibiyetiniñ reberi Bogdan Kriklivenko bildirdi ki, Qırım ile memuriy sıñırda Rusiye FSB hadimleri tarafından yaqalanğan ukrain uquq qorçalayıcıları Ukraina kontroli altındaki yerde bulunalar.

Mart 13-de kündüz Qırım ve esas Ukrainanıñ memuriy sıñırındaki «Kalançak» kiriş noqtasında uquq qorçalayıcılar gruppası, şu cümleden Olga Skrıpnik ve ukrain ombudsmeni ofisiniñ vekili, yaqalandı.

Ukraina Yuqarı Radasınıñ insan aqları vekâletlisiniñ ofisi Qırım.Aqiqatqa bildirdi ki, ofis hadimi Qırım ile memuriy sıñırda yaqalanğan uquq qorçalayıcılarnen buluna, amma hadimniñ soaydını aytmadı.

Ukraina devlet sıñır hızmetiniñ matbuat kâtibi Oleg Slobodân Qırım.Aqiqatqa bildirdi ki, mart 13-de Qırım ile memuriy sıñırda Rusiye uquq qoruyıcıları tarafından yaqalanğan uquq qorçalayıcılar «Kalançak» kiriş-çıqış noqtasını qanun boyunca keçti.

Qırım Rusiye kontroli altına keçken soñ yarımadada FSB jurnalist, advokat, cemaat erbabı ve qırımtatarlarnı sorğuğa çekip, evlerinde tintüvler keçire.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı kösterilmesini toqtatmağa çağırdı.

XS
SM
MD
LG