Link açıqlığı

Milliy Meclis reisiniñ muavini «E Merkezine» çağırttırıldı


Ukraine, Crimea - First Deputy Head of the Mejlis Nariman Jalal, 14Jul2015Nariman Celâl

Ukraine, Crimea - First Deputy Head of the Mejlis Nariman Jalal, 14Jul2015Nariman Celâl

Qırımtatar Milliy Meclis reisiniñ birinci muavini Nariman Celâl Aqmescitte ekstremizmge qarşı küreş Merkezine çağırttırıldı. Bunı Qırım.Aqiqatqa Qurultaynıñ MSK reisi Zair Smedlâyev bildirdi.

«Million çeşit fikirler olmaq mümkün. Çıqsa – tam olaraq bilecemiz... Bir tek dediler ki, felânça biri şikâyet yazğan eken», – dep ayttı Smedlâyev.

Şimdilşk, Qurultaynıñ MSK reisiniñ malümatına köre, Celâlnıñ özü «E Merkezinde» buluna, Qırım.Aqiqat onnen bağlanıp olamay.

Qırım Rusiye nezaretine keçkeninen FSB yarımadada muntazam surette tintüvler keçire, jurnalist, faaller, cemaat erbapları sorğulana, qırımtatar vatandaşları yaqalana. Uquq qorçalayıcılar bunı «farqlı fikirlerge qarşı küreş» kibi köreler.

2016 senesi aprelde Rusiyeniñ nezaretindeki Qırım Yuqarı mahkemesi işğal etilgen yarımadada Meclisniñ areketini yasaq etti. Dünya cemaatı, Rus akimiyetiniñ böyle areketlerine qarşı çıqıp, qattiyen narazılıq bildirdi. Meclisniñ imayesi Rusiyeniñ Yükek mahkemesine itiraz yolladı, lâkin apellâtsiya mahkemesi de Meclisniñ yasaq etilmesine qol tuttı.

Ukraina Tışqı işler nazirligi, işğal etilgen Qırımda ukrain vatandaşlarınıñ taqip etilmesinen raatsız olğanını bildirdi ve basqılarnı toqtatmağa çağırdı.

Yanvar 16 künü Ukraina, BM Teşkilâtınıñ aliy mahkeme organına – Halqara mahkemege muracaat etti ve Rusiye tarafından terrorizmge maddiy deste berilmemesi ve ırq ayırımcılığınıñ toqtatılması aqqında halqara añlaşmalar bozulğanına şikâyet etti.

XS
SM
MD
LG