Link açıqlığı

 «Hizb ut-Tahrir davasınıñ» mabusı insan aqlarınıñ qorunması saasında faalleşmege çağırdı


Ruslan Zeytullayev «Hizb ut-Tahrir davasınıñ» mahkemesinde, arhiv fotoresimi

Rusiye tarafından Rostovdaki apishanesinde tutıqlanğan Aqyarlı Ruslan Zeytullayev, yazğan mektübinde uquq qoruyıcılarnı qırımtatar ve ukrainlerniñ aqlarını qorumaq işinde faalleşmege çağırdı. Bunı mart 8 künü «Söz serbestligi» Facebook gruppasında bildirdiler.

Öz mektübinde Zeytullayev: «Ukrainada ve çeteldeki faallerni Qırımda qırımtatarlar, musulmanlar, jurnalistler, ukrainlerniñ aqlarına dair qanunsız areketlerge qarşı basqı köstermek işinde faalleşmege çağıram! Çünki ancaq halqara basqınen istenilgen neticege yetmege mümkün, bu birden olmaz, bunıñ içün bu büyük problemge daima diqqat ayırılmalı», – dep yazdı.

Rostov-na-Donu şeerindeki Şimal-Kavkaz bölge arbiy mahkemesi, iyün 1-de mahkemeni başlap, sentâbr 7 künü «Hizb ut-Tahrir» ile alâqalarınen qabaatlanğan Qırım musulmanlarınıñ işi boyunca ükmüni çıqardı. Mahkeme qararına binaen, Aqyar sakini Ruslan Zeytullayev «Hizb ut-Tahrir» bölügini teşkil etti dep yedi yılğa, Ferat Sayfullayev, Rustem Vaitov ve Nuri Primov ise beş yılğa qadar apiske alındı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Tışqı işler nazirligi, Rusiye akmiyeti tarafından yapılğan «nevbetteki safsata mahkemesini» takbih etti ve Rusiyeden deral ükümüni lâğu etmesini talap ete.

XS
SM
MD
LG