Link açıqlığı

Ukraina menfaatlarını temsil etken Jonathan Gimblett Birleşken milletler teşkilâtınıñ Halqara mahkemesinde Rusiye qırımtatarlar ve etnik ukrainlerni ayırımğa oğrata, dep bildirdi. Bunı o, mart 8-de Rusiye tarafınıñ çıqışına cevap olaraq ayttı.

«Rusiye qırımtatarlarnı ve ukrainlerni Qırımda esas yerni almağa keder etken bir şey olaraq tanıy», – dep ayttı o.

Gimblettniñ aytqanına köre, Rusiye tarafı Qırımdaki vaziyetni izaatlap, Gaaga mahkemesinde «alternativ bir kerçekni» aydınlattı.

Ukraina menfaatlarınıñ temsilcisi Rusiye tarafınıñ Rusiye akimiyeti Qırımda insan aqlarını teminlemek içün ğayret köstergenine dair malümatını red ete. Jonathan Gimblett Qırımtatar Milliy Meclisiniñ yasağı ve yarımadada qırımtatarlar ğayıp olğanını hatırlattı.

Gimblett şunı da hatırlattı ki, Qırımnıñ rus anayasası rusça, ukraince ve qırımtatarcanı tanıy, amma yarımadada kene de rusça esas til sayıla. Matbuat vastalarınıñ ekseriyeti rus tilinde çalışa. Memuriy binalardaki levhalar da rusça yazılğandır. Jonathan Gimblettniñ qayd etkenine köre, yarımadadaki tasil de aynı vaziyette.

Rusiye tarafı Gaaga mahkemesinde Qırımda qırımtatarlar ve ukrainlerniñ aq-uquqları bozulğanını ve olarğa nisbeten ayırım olğanını red etti.

Mart 6-da Birleşken Milletler Teşkilâtınıñ Halqara mahkemesinde (Gaaga, Felemenk) Ukrainanıñ Rusiyege qarşı açtırğan davası boyunca açıq diñlevler başladı. Mart 7-de mahkemede Rusiye vekili çıqışta buluna.

Ukraina Halqara mahkemeden dava baqılğan müddet devamında tedbir almağa rica ete.

Böyle tedbirler arasında – Rusiyeden «Ukrainada vatandaşlarğa qarşı terrorist areketlerini yapqan taqımlarğa» maddiy ya da bir de bir diger yardım kösterilmesini toqtatmasını talap etmek, bunıñ kibi gruppalarğa ise tesir etip, ileride böyle bir areket yapmamalarını temin etmek, em de Qırımda millet ayırımı, şu cümleden Qırımtatar Milliy Meclisi faaliyetiniñ yasağınıñ toqtatılması ve qırımtatarlarnıñ qaçırılmasını taqiq etilmesini talap etmektir.


XS
SM
MD
LG