Link açıqlığı

Ali Asanov mahkemede Qırım muftisi oña Çiygozğa qarşı ifade bermege teklif etkenini beyan etti – advokat


Ali Asanov mahkemede, arhiv fotoresimi

Ali Asanov mahkemede, arhiv fotoresimi

Kreml nezaretindeki Qırım Yuqarı mahkemesinde «Çiygoz davasınıñ» 87-ci mahkeme toplaşuvında, 2014 senesi fevral 26 künü kütleviy qalabalıqlarda iştirak etkeninde qabaatlanğan Ali Asanov, ifadelerini berip, taqiqatçı oña basqı yapıp, qabaatını qabul etmege ve Çiygozğa iftira atmağa zorlatqanını, Qırım muftisi Emirali Ablayev ise apisten azat olunmaqnıñ qarşılığında Ahtem Çiygozğa qarşı ifade bermege teklif etkenini bildirdi.

Bunı mart 6 bazarertesi künü keçken «Çiygoz davasınıñ» mahkeme topaşuvını Facebookta izaatlap Nikolay Polozov bildirdi.

Advokatnıñ sözlerine köre, başlanğıç taqiq ketişatı aqqında tarif etip, Ali Asanov, taqiqatçı ondan qabaatını qabul etmek ve Ahtem Çiygozğa qarşı ifade bermesini talap ete edi, dep ayttı.

Nikolay Polozov tarif etti: «Apis müddeti nevbetteki sefer uzatılğan soñ taqiqatçı, evine ve çağına yetmegen balalarına qaytmağa teklif etken edi. Ali Asanov, mahkeme apis cezasını daa eki ayğa uzatqanını aytqanda, taqiqatçı: «Mahkeme degil, men qarar alam», – degen eken. Ondan da ğayrı, bir keresi onı Mustafa Degermencinen beraber apisten taqiq komitetine ketirgenler, anda mufti Emirali Ablayev eni buluna edi ve o apisten çıqmağa yardımcı olacağına kefaletiniñ qarşılığında Ahem Çiygozğa qarşı ifade bermege çağırğan. Ali Asanov bunı red etti, çünki onıñ közünde aqiqat ve namus aniy kârdan daa qıymetlidir. «Ahtem Çiygoz yerinde başqa bir insan olsa edi, men onıñ aqqında da yalan aytmaz edim», – dedi Ali Asanov».

O qayd etti ki, Mustafa Degermenci ve Ali Asanov mahkemede sorğudan keçken soñ, Ahtem Çiygoz «olarğa cesaret ve doğrulıq içün minetdarlıq bildirdi».

Mahkemede Ali Asanov «Ukraina tarafdarları olğan miting iştirakçileriniñ zorbalıqqa çağırğanlarını eşitmegenini, Ahtem Çiygoznı körmegenini ve onıñ areketleri aqqında bir şey aytıp olamacağını» ayttı.

Mahkeme toplaşuvında, 2014 senesi fevral 26 künü kütleviy nizamsızlıqta iştirak etkeninde qabaatlanğan Mustafa Degermenci de, ifadelerini berip, taqiqatçı oña basqı yapıp, qabaatını qabul etmege ve Çiygozğa iftira atmağa talap etkenini, Qırım muftisi Emirali Ablayev ise apisten azat olunmaq qarşılığında Ahtem Çiygozğa qarşı ifade bermek teklif etkenini bildirdi.

Kreml nezaretindeki Qırım ve Aqyar müsülmanları diniy idaresinde Nikolay Polozovnıñ sözlerini izaatlamaylâr. Qırım.Aqıqat Qırım muftisi haci Emirali Ablayevniñ izaatını almağa tırışa.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

XS
SM
MD
LG