Link açıqlığı

Sürgün etilgen Qırım faali Nedim Halilov Rostov vilâyetindeki filtratsion noqtasında buluna. Qırımlınıñ Facebookta bildirgenine köre, onı Özbekistanğa yollap olamaylar, Qırımğa da kirsetmeyler. Mart 6-da faal Qırım.Aqiqatqa izaat berip, filtratsiya noqtasında qalmağa imkânı olsa da, vatanı Qırımğa qaytmaqtan vazgeçmegenini qayd etti.

«Özbekistan vatandaşlığını alma aqqından marum etilgenim belli, onı ğayrıdan tiklemek içün ariza yazmam kerek, men ise bunı yapmaycam. Qırımğa meni yollamaycaqlar, çünki mecburen vatandaşlıqsız şahıs şeadetnamesini bermek kerekler, vatandaşlığı olmağan insan ise, hususan qırımtatarı, adiy vatandaşqa baqqanda qat-qat ziyade aq saibi ola», – dep tarif etti Halilov.

Faal bildirdi ki, onıñ Keriçte qayd olğanını isbatlağan Sovet Birligi pasportı (başqa vesiqası yoq) bozuldı. Halilov iş malümatlarını talap etip, vesiqa aqqında haber almağa tırışa. Pasport 2016 senesi noyabr ayında mahkeme talabınen tutıp alındı, o künden berli faal şahsiyetini isbatlağan vesiqasını körmedi.

«Pasportım bozulğanına dair akt tizecek olam, olar keçken aftadan berli indemey oturalar, vesiqalar migratsiya hızmetinde edi, lâkin anda vesiqa çoqtan memuriyetke berildi, dep aytalar. Şahsiy işimniñ malümatlarını ögrenmege rica etem», – dep ayttı faal filtratsion noqtasındaki faaliyetini tarif etip.

O, şaraitler eyi, aş bar, hadimlerniñ munasebeti güzel, lâkin olarnı tışarı yibermeyler, dep ayttı.

Halilov açlıq grevini toqtatqan soñ özüne keldi, meşğuliyetler yapa.

Qırımda yaşamaq aqqından marum etilgen Halilov narazılıq olaraq 2016 senesi noyabr 21-de açlıq grevine başlağan edi. 2017 senesi yanvar 5-de 45 kün devamında aşamağanından sebep Halilov açlıqnı toqtatmağa qarar aldı.

Noyabr 7 künü Kreml kontrolündeki mahkemeniñ qararı ile qırımtatarı Nedim Halilov Qırımdan tış çıqarıldı. Halilovqa evine kirip, sıcaq urba, para ve vesiqalarını almağa izin berdiler. Dekabr 29-da Halilov Krasnodar ülkesindeki filtratsion noqtada qala edi.

2016 senesi yazda «Qırımtatarlarnıñ qarşılıq areketi» teşkilâtınıñ koordinatorı Nedim Halilov halqara uquq ve Rusiye qanunlarına esaslanıp, Rusiye kontrol etken Aqmescit Merkeziy mahkemesine Rusiyeniñ Qırımdaki qırımtatarlarğa qarşı yapqan areketleriniñ qanunsız tanılması içün muracaatta bulundı. O, qırımtatar tiline devlet tili statusınıñ berilmesini ve mahkeme oturışını qırımtatarca alıp barmağa talap etti.

XS
SM
MD
LG