Link açıqlığı

İşğal etilgen Qırımda episi olıp 371 bala ukrain tilinde tasil ala. Qırımda umumtasil müessiselerinde oquğan talebelerniñ sayısına nisbeten, bu tahminen 0,1% teşkil ete. Bu aqta Kremlge bağlı Qırım Tasil, ilim ve gençlik naziri Natalya Gonçarova bildirdi, dep müessiseniñ matbuat hızmeti mart 2 künü haber ete.

Bütün yarımadada umumtasil müessiselerinden tek Kefede № 20 mektep ukrain tilinde tasili berip yekâne qaldı. O 9 sınıftan ibaret ve 132 talibeni oquta. Daa 12 rus tilinde tasili olğan mekteplerde 19 ukrain sınıfı bar. Olarda 139 talebe tasil ala.

Qırımtatar tilinde 5,4 biñ bala tasil ala. Bu tahminen 3%. Bu yılı yarımadada 15 umumtasil müessise qırımtatar tilinde tasil bere (201 sınıf, 3651 talebe). Daa 37 rus tilinde tasili olğan mekteplerde 137 qırımtatar sınıfı mevcut. Olarnı 1730 bala ziyaret ete, dep haber ete Qırımdaki müessise.

Bundan evel Aqmescit ve Qırım arhiyepiskopı Kliment Qırımdaki memurlar ukrain mektep ve sınıflarını zorbalıqnen qapatqanını aytqan edi.

Qırımda 2013 senesi mektep tasilini talebelerniñ 89,4% rus tilinde ala edi, aynı zamanda ukrain ve qırımtatar tilinde – 7,3% ve 3,1%. Qırım zapt etilgende qırımtatar tilinde tasili olğan 14 mektep, ukrain tilinde 7 mektep bar edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG