Qırımlı advokat Emik Kurbedinov fikirine köre, Qırımtatar Milliy Meclis reisiniñ muavini İlmi Umerovnıñ işini Kreml nezaretindeki Qırım mahkemesi tarafından bir ay içinde baqılmağa başlaycaq.
Bunı Kurbedinov mart 1 künü İlmi Umerov Rusiyeniñ Qırımdaki FSB idaresine çapırttırılğan soñ dedi.
İlmi Umerovnıñ qızı Aqşe Facebookta yerleştirgen video-levhada advokat: «Bugün bizge cinaiy iş boyunca taqiqat endi yekünlengenini ve bugünden başlap işniñ malümatları ögrenilecek. Anda üç cılt toplanılğan, er biri 250 saifelik. Bugün bir qısımnıñ fotokopiyalarını aldıq, ve yaqın zamanda cuma ve bazarertesi künleri kopiyalar çıqaracağımız aqqında añlaştıq. Bundan soñ taqiqatqa bir qaç muracaatımız olacaq, bundan soñ ise bir ay içinde işiniñ maddeleri mahkemede baqılıp başlaycaqtır», – dep ayta.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.
İlmi Umerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826. Umerov, bu cedvelge kirsetilmesine qarşı mahkemede itiraz bildirmege niyetli olğanını beyan etti.
