Link açıqlığı

Saatnıñ esas haberi

Qırımda ukrainler ve qırımtatarlarnıñ kimligini yoq etmege areket eteler – Klimkin


Pavlo Klimkin, ©Shutterstock
Pavlo Klimkin, ©Shutterstock

Ukraina Tışqı işler naziri Pavlo Klimkin dey ki, Qırımda Kreml nezaretindeki akimiyet ukrainler ve qırımtatarlarnıñ kimligini yoq etmege areket ete. Fevral 28 kübü böyle beyanatnen Klimkin Cenevrede teşkil etilgen BMT İnsan aqları Şurasınıñ 34-ci toplaşuvında çıqışta bulundı, toplaşuv fevral 27 – mart 3 künleri devamında ötkerilecektir.

Ukraina Tışqı işler nazirliginiñ matbuat hızmeti Klimkinniñ böyle sözlerini yaza: «Bu künge qadar Donbasta 10 biñinsan öldürildi ve 22 biñ insan yaralandı, Qırım ise adaletsizlik, terror ve zulum ile ğam çekken «kül renkte bir yer» oldı. İşğalci akimiyet muntazam surette insan aqlarını boza, ukrainler ve yarımadanıñ asıl halqı – qırımtatarlarnıñ kimligini yoq etmege areket ete».

Fevral 27 – mart 3 künleri Cenevrede keçecek BMT İnsan aqları Şurasınıñ 34-ci toplaşuvı çerçevesinde Ukraina parlament vekilleri zapt etilgen Qırımda insan aqlarınıñ vaziyeti mezakere etmek içün tedbir keçirmege azırlanalar.

Ukraina Tışqı işler naziri Pavlo Klimkin, Cenevrede, dünya cemaatına muracat etip, Rusiyeni öz borcunı eda etmege mecbur ettirmek çağıruvınen seslendi, ve Ukraina ukrain Qırımı ve anda yaşağan insanlar içün küreşecegini ayttı.

Qırım Rusiye nezaretine keçkeninen FSB yarımadada muntazam surette tintüvler keçire, jurnalist, faaller, cemaat erbapları sorğulana, qırımtatar vatandaşları yaqalana. Uquq qorçalayıcılar bunı «farqlı fikirlerge qarşı küreş» kibi köreler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG