Link açıqlığı

Çubarov Cenevrede Rusiyeni Qırımğa dair muzakere sofrasına keçmege mecbur etmege çağırdı


Refat Çubarov

Refat Çubarov

Qırımtatar Milliy Meclis resisi Refat Çubarov dey ki, Rusiyeni yarımadadan keteceginen bağlı meseleler aqqında muzakere sofrasına keçmege «mecbur etmege» kerek. Fevral 28 künü böyle beyanatnı Refat Çubarov Cenevrede seslendirdi, anda o fevral 27 – mart 3 künleri keçecek BMT İnsan aqları Şurasınıñ 34-ci toplaşuvında iştirak ete.

Öz Facebook saifesinde Çubarov, Cenevredeki nutuğı devamnda seslendirgen böyle sözlerini yerleştirdi: «Vaqıt coymayıp, Qırımnıñ işğalden azat olunması ve qırımtatar halqınıñ aqlarını tiklemek içün halqara meydançıq qurulmaq kerek. Rusiyeni mecbur etip, onıñ yarımadadan keteceginen bağlı meseleleri aqqında muzakere sofrasına çekmege kerek».

Fevral 27 – mart 3 künleri Cenevrede keçecek BMT İnsan aqları Şurasınıñ 34-ci toplaşuvı çerçivesinde Ukraina parlament vekilleri zapt etilgen Qırımda insan aqlarınıñ vaziyetini muzakere etmek içün tedbir keçirmege azırlanalar.

Ukraina Tışqı işler naziri Pavlo Klimkin, Cenevrede, dünya cemaatına muracat etip, Rusiyeni öz borcunı eda etmege mecbur ettirmek çağıruvınen seslendi, ve Ukraina ukrain Qırımı ve anda yaşağan insanlar içün küreşecegini ayttı.

Qırım Rusiye nezaretine keçkeninen FSB yarımadada muntazam surette tintüvler keçire, jurnalist, faaller, cemaat erbapları sorğulana, qırımtatar vatandaşları yaqalana. Uquq qorçalayıcılar bunı «farqlı fikirlerge qarşı küreş» kibi köreler.

Avropa ve Avropa-Atlantik bütünleşme boyunca suallaerde Ukraina Baş naziriniñ muavini İvanna Klimpuş-Tsintsandzeniñ malümatına köre, fevral 25 kününe itibaren Qırımda işğalden başlap 12 insan vefat etti, 17 insan ğayıp oldı, 39 siyasiy mabusı oldı, olardan 10 mahkeme cezasını aldı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG