Rusiyeniñ Qırımdaki Federal telükesizlik hızmeti fevral 28 kününe Qırımtatar Milliy Meclis reisiniñ muavini İlmi Umerovnen tain etilgen körüşüvini başqa künge keçirdi.
Umerovnıñ öz Facebook saifesinde haber etkenine köre, körüşüv qorçalağan tarafnıñ teşebbüsinen keçiktirildi.
O: «Bugünge tainlengen FSB ile körüşüv advokatlar Kurbedinov ve Semedlâyevniñ muracaatları ile yarınğa, mart 1 künü saat 15-ke keçiktirildi. Körüşüv yeri – Franko caddesi...», – dep yazdı.
İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.
Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.
İlmi Umerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826. Umerov, bu cedvelge kirsetilmesine qarşı mahkemede itiraz bildirmege niyetli olğanını beyan etti.
