Link açıqlığı

Qırım Muhtar Cumhuriyetiniñ prokuraturası 1944 senesi qırımtatar sürgünligini taqiq etmekte. Taqiqat 2017 senesi yekünlenmeli, bunı Qırım prokurorı Günduz Mamedov «Ukrain haberlerine» bildirdi.

«Bu Qırım Muhtar Cumhuriyeti prokuraturasınıñ taqiqatçıları baqqan eñ aktual işlerden biridir. Bizler bunıñnen bağlı faal tedbirlerni keçiremiz: sorğu, ekspertizalar. Bu sene bu cinaiy taqiqatnı yekünlemek niyetindemiz. Bizim içün bu tarihiy adaletniñ tiklenmesidir», – dep bildirdi Mamedov.

Qırım Muhtar Cumhuriyetiniñ prokuraturası 2016 senesi sovet akimiyetiniñ qırımtatarlarnı ve Qırımnıñ diger tamır halqlarınıñ yarımadadan sürgün etkenine dair cinaiy taqiqat başlatqan edi. Rusiye işğalinden soñ esas Ukrainağa köçken Qırım prokuraturası 160 insandan ibaret cedvel tizdi. Vesiqada 1944 senesi sovet akimiyeti tarafından repressiyalarğa oğratılğan insanlar ve qorantalarınıñ malümatları mevcuttır.

Qırımtatarlar Qırımdan 1944 senesi mayıs 18-de sürgün etildi. Yarımadanıñ tamır halqı tolu eşelonlar Özbekistan, Qazahistan ve Tacikistanğa yollanıldı. 1989 senesi SSCB Yuqarı Şurası sürgünlikni qanunsız ve cinaiy tanıdı, Ukrainada o qırımtatar halqınıñ genotsidi olaraq tanıldı. Er yıl mayıs 18-de hatıra künü ola.

XS
SM
MD
LG