Link açıqlığı

Faaller Moskvada «Qırımtatarlarğa azatlıq ve muhtariyet!» şiarlarınen piket keçirdi


«Boris Nemtsov yürüşi», Qırımdaki repressiyalarğa qarşı kolonna, Moskva, fevral 26 künü

Fevral 26-da Moskva faalleri qollarına «Çiygoz, Asanov, Degermencige azatlıq», «stop pressing» levhalarını alıp, «Qırımtatarlarğa azatlıq ve muhtariyet!», «Yaşasın Ukraina! Qaramanlar yaşasın!» şiarlarınen Rusiye paytahtınıñ soqaqlarında piket ötkerdi, dep bildire teşebbüsçiler Facebookta.

«Al-azırda bir çoq adam terrorizm olmasa da, uydurılğan terrorizm işlerinen qabaatlana. Sentsov ve Kolçenko da terrorist sayıla, bizler qabaatsız olğanlarnı azat etmege talap etemiz, «Memorial» ve diger uquq qorçalayıcı teşkilâtlar olarnı siyasiy mabus olaraq tanıylar. Ukraina ve Suriyege qarşı cenk toqtatıla bile, Qırımnı işğalden azat etmek kerek», – dep ayttı piket iştirakçisi Vera Lavreşina.

Aktsiya iştirakçileri Qırımnıñ siyasiy mabuslarını da azat etmege talap etti. Faallerniñ qollarında ukrain ve qırımtatar bayraqları bar edi.

Aynı künü Moskvada «Boris Nemtsov yürüşi» çerçivesinde ukrain siyasiy mabuslarına qoltutuv ve Qırımdaki repressiyalarğa qarşı kolonna bar edi.

Moskva ve Sankt-Peterburg şeerleriniñ faalleri 1944 senesi mayıs 18-de olğan qırımtatar sürgünliginiñ künü munasebetinen «Strategiya-18» müddetsiz aktsiyasında birleşti. Er aynıñ 18-de faaller şeer soqaqlarına çıqıp, işğal etilgen Qırım vaziyetini, insan aqlarınıñ bozulmasını aydınlatalar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.


XS
SM
MD
LG