Link açıqlığı

Qırımtatar Milliy Meclis reisiniñ muavini İlmi Umerovnı kenede FSB taqiqatçısına çağırttırdılar. Körüşüv fevral 28 kününe tain etildi. Bunı Umerov fevral 27 künü Facebookta haber etti.

Daa tafsilâtlı malümatnı İlmi Umerov bildirmedi, lâkin körüşüvden soñ haberlerni bildirecegini yazdı.

İlmi Umerovğa qarşı ekstremizm maddesi boyunca FSB tarafından cinaiy iş açılğanını 2016 senesi mayıs 12 künü Qırımnıñ sabıq prokurorı Natalya Poklonskaya beyan etken edi.

Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.

İlmi Umerovnıñ qızı Ayşe 2016 senesi dekabr 30-da bildirdi ki, babası Rusiye maliye monitoringi federal hızmetiniñ saytında derc etilgen terrorist ve ekstremistler cedveline kirsetilgen. Onıñ nomerası 5826. Umerov, bu cedvelge kirsetilmesine qarşı mahkemede itiraz bildirmege niyetli olğanını beyan etti.

XS
SM
MD
LG