Link açıqlığı

Ukraina millet vekili Andriy Artemenko bergen matbuat konferentsiyası devamında soñki aylârı Rusiye paytahtı Moskvanı ziyaret etkenini tasdiqladı.

«Moskvada oldımı tasdiqlayım. Bütün ziyaretlerim Ukraina Telükesizlik hızmeti ile uyğunlaştırıldı. Teesüf ki, tavsilâtlıca añlatıp olamam» – dedi o.

Millet vekili «Ukraina meselesine diqqat celp etmek vazifesini devam etmek içün» yaqın zamanda kene AQŞ ziyaret etmek niyetinde olğanını bildirdi.

UTH Artemenkonıñ bu sözlerini izaatlamadı.

Radikal firqanıñ yolbaşçısı Oleg Lâşko «mabetlik planı» ortağa çıqqanından evel Artemenko bir-qaç kere Moskvanı ziyaret etkeni aqqında ayttı.

Fevral 19 künü New York Times gazetinde derc etilgen maqalede yazıla ki, Milliy telükesizlik suallerinde AQŞ prezinetniniñ mesleatçısı Michael Flynn, istifağa ketmezden bir afta ögüne, Donald Trumpqa yaqın olğan şahıslardan Ukrainadaki umumiy vaziyetiniñ tüzetilmesi çerçivesinde Rusiyege qarşı kirsetilgen sanktsiyalarını toqtatmaq tekliflerini aldı.

Neşirde qayd etkenlerine köre, Trumpnıñ advokatı Michael Cohen, SSBC-de doğğan AQŞ prezidentniñ iş ortağı, Rusiyede biznes saasında oña yardım etken Felix Sater ve Ukraina millet vekili Andriy Artemenko bu tekliflerniñ azırlanmasında iştirak ettiler. Neşirniñ malümatına köre, muabbetlik planı – Ğarbiy Ukrainadan bütün Rus ordularınıñ çıqarılması ve Qırımnıñ Rusiyege 50 ya da 100 yılğa kirağa berilecegi aqqında Ukrainada referendumnıñ ötkerilmesi kire edi. Qırım Muhtar Cumhuriyetiniñ prokuraturası bu mesele boyunca cinaiş iş açtı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG