Fevral 26, bazar künü Parijde Eyfel qullesi yanında «Qırım – Ukrainadır» aktsiyası keçti.
Ukraina Haber siyaseti naziriniñ birinci müavini Emine Ceppar Facebook saifesinde haber etkeni kibi, tedbir «Global Ukraine halqlar diplamatiya ağı» cemaat teşkilâtı tarafından teşkil etildi.
«Fevral 26 – Qırımnıñ Rus işğaline qarşı küreş Künü. Ukraina Haber siyaseti nazirliginiñ destekçileri – Global Ukraine halqlar diplamatiya ağı – Parijde Eyfel qullesi tübünde toplaşıp «Qırım – Ukrainadır» aktsiyasını keçirdiler», – qayd etti o.
Fevral 26 künü Ukrainada «Qırımnıñ Rus işğaline qarşı küreş Künü» qayd etile, bütün Ukrainada Qırımğa destek bildirmek içün aktsiyalar keçirilecek. Bu künü Qırım Yuqarı Şurası binası qarşısında Ukrainanıñ topraq bütünligine destek olaraq miting keçirilgen edi. O vaqıt mitin iştirakçilerine qarşı Rusiye tarafdarları, şu cümleden «Russkoye yedinstvo» virqasınıñ vekilleri çıqqan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
