Link açıqlığı

Fevral 25-26 künleri Kiyevte Ukraina Nazirler Şurasınıñ Klubında «Qırım işğal altında: Ukraina ve dünyağa olğan tesiri» adı ile Halqara forum keçecek. Bunı Ukraina Haber siyaseti nazirliginiñ matbuat hızmeti bildirdi.

«Tetbirde iştirak etmek içün akimiyet vekilleri, diplomatlar, cemaat faalleri, Qırım meselesinen meşğul olğan Ukraina ve diger ülkelerden esas ekspertler davet etildi», – dep haber etile.

Ayrıca müessisede qayd eteler ki, subette qırımtatar halqınıñ lideri Mustafa Cemilev, Qırımtatar Milliy Meclis reisi, Ukraina millet vekili Refat Çubarov, Ukraina Yuqarı Rada yolbaşçısınıñ birinci muavini İrina Geraşenko, Haber siyaseti naziri Yuriy Stest, Haber siyaseti naziriniñ birinci muavini Emine Ceppar, Avropa ve Avropa-Atlantik bütünleşme boyunca suallaerde Ukraina Baş naziriniñ muavini İvanna Klimpuş-Tsintsandze, Ukraina Tışqı işler naziri Pavlo Klimkin ve başqaları iştirak etecek.

Ukraina Yuqarı Radasında fevral 23 künü «Rusiye işğaline qarşı çıquv künüve» bağışlanğan «Qırım künleri» keçti. Tedbir çerçivesinde 2014 senesi fevral 26 künü Qırımda yüz bergen adiseler aqqında Halqara ekspertler taqımınıñ maruzası taqdim etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG