Link açıqlığı

Fevral 24 künü Ukraina millet vekili Andriy Artemenko Qırım MC prokuraturasına ifade bermek içün keldi. Bunı UNIAN haber ete.

Neşir yaza ki, onıñ sözlerine köre, mahkemege resmiy şekilde o davet etilmedi, kütleviy haber vastalarından malümat aldı ve tek bundan sebep keldi. Bunnen beraber Artemenko saqlanmacağını ve taqiqatnen işbirlikte bulunıp qabaatlı olmağanını isbaatlacağını ayttı.

Fevral 19 künü New York Times gazetinde derc etilgen maqalede yazıla ki, Milliy telükesizlik suallerinde AQŞ prezinetniniñ mesleatçısı Michael Flynn, istifağa ketmezden bir afta ögüne, Donald Trumpqa yaqın olğan şahıslardan Ukrainadaki umumiy vaziyetiniñ tüzetilmesi çerçivesinde Rusiyege qarşı kirsetilgen sanktsiyalarını toqtatmaq tekliflerini aldı.

Neşirde qayd etkenlerine köre, Trumpnıñ advokatı Michael Cohen, SSBC-de doğğan AQŞ prezidentniñ iş ortağı, Rusiyede biznes saasında oña yardım etken Felix Sater ve Ukraina millet vekili Andriy Artemenko bu tekliflerniñ azırlanmasında iştirak ettiler. Neşirniñ malümatına köre, muabbetlik planı – Ğarbiy Ukrainadan bütün Rus ordularınıñ çıqarılması ve Qırımnıñ Rusiyege 50 ya da 100 yılğa kirağa berilecegi aqqında Ukrainada referendumnıñ ötkerilmesi kire edi.

Qırım Muhtar Cumhuriyetiniñ prokuraturası, kütleviy haber vastalarında yayınlanğan malümatlar esasında, Ukraina millet vekili Ardriy Artemenkoğa qarşı cinaiy iş açtı. Qırım Muhtar Cumhuriyetiniñ «kirağa» berilecegi aqqında plan azırlağan şahıslar sırasında onıñ da adı keçe. Cinaiy iş açılması aqqında fevral 21 künü Facebookta Ukraina baş prokurorı Yüriy Lutsenko beyan etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG