Link açıqlığı

Saatnıñ esas haberi

Polozov: Bavurçıdaki yaqalavlar fevral 26 künü arfesinde qırımtatarlarnı qorquzmaq içün oldı


Nikolay Polozov
Nikolay Polozov

Qırımtatarlar Aqmescitte fevral 26 vaqialarınıñ üçünci yıllığında mitingge toplaşmasın dep, işğal etilgen Qırımnıñ Rusiye akimiyeti olarğa qarşı repressiyalarnı quvetleştirdi. Bunı fevral 23-de Ukraina Yuqarı Radasında Rusiye advokatı Nikolay Polozov ayttı, dep yaza QHA.

«Menim fikirimce – qorquzmaq isteyler, 2014 senesi fevral 26 vaqialarınıñ yıllığı arfesinde bir aktsiya, insanlar toplaşmasını istemeyler. Artıq tek saylanğan qurbanlarnı tutmaylar, olarğa qoltutmağa ve adiseni başqalarğa yetkizmek içün kelgen faallerni de alalar. Mence, bu Rusiye akimiyetiniñ repressiyalarıdır», – dep ayttı Polozov.

Advokatnıñ qayd etkenine köre, yaqalavlar arfesinde Bavurçı sakinleri birleşmege qarar berdiler. Aqmescitteki Bavurçı qasabasında hırsızlıq ve çapullar sıq-sıq olğanından soqaqlarda nevbetçilik yapmağa qarar alınğan edi.

Qırımda, Aqmescitteki Bavurçı qasabasında, fevral 21-de Rusiye uquq qoruyıcıları Marlen Mustafayevniñ evinde tintüv keçirgenler.

Marlen Mustafayevge qoltutmağa kelgen insanlardan da 10-dan ziyadesi yaqalandı. İnsanlarnı yaqalamazdan ögüne politsiya hadimleri megafon vastasınen toplaşqanlar kütleviy merasimler aqqında qanunlarnı bozğanlarını ilân ettiler.

Kreml kontrol etken Aqmescitniñ Kiyev rayon mahkemesi Marlen Mustafayevni 11 künge memuriy apiske aldı. Mustafayevni Rusiye Memuriy cinayetler kodeksiniñ 20.3 maddesiniñ 1-inci qısmı (natsist timsalleriniñ teşviqatı ve açıq numayışı) boyunca qabaatlaylar. Bunıñ sebebi 2014 senesi iyül ayında «VKontakte» içtimaiy ağında paylaşqan «Hizb ut-Tahrir» teşkilâtına ait timsallerniñ fotoresimi oldı.

Fevral 21-de Bavurçı qasabasında yaqalanğan qırımlılarnıñ bir qısmı beş künge qadar apiske alındı. Olarğa nisbeten Rusiye Memuriy cinayetler kodeksiniñ 20.2 maddesine köre (toplaşuv, miting keçirilmesi ya da teşkil etilmesine dair nizamnı bozuv) protokollar tizildi.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

XS
SM
MD
LG