Link açıqlığı

Qırımda fevral 22 künü «fevral 26 işi» boyunca nevbetteki mahkeme toplaşuvı yekünlendi. Advokat Edem Semedlâyevniñ sözlerine köre, bugün yekâne şaatnı sorğulap olamadılar.

Qırım.Aqıqatqa bergen izaatında advokat Edem Semedlâyev: «Yekâne şaatnı sorğulap olamadıq, advokat Omelçenko mazeretinen bir buçuq saatke keç qalğanı sebebinden, o mahkeme toplaşuvınıñ başlanğanını beklep olamadı», – dedi.

Ondan da ğayrı advokat, nevbetteki mahkeme toplaşuvı fevral 27 kününe tainlengenini haber etti.

Semedlâyev: «İş mahsus sozulğanını belleymiz. Meselâ, keçken mahkeme toplaşuvında biz tek bir şaatnı soraştırıp oldıq, bügün ise iç bir şaatnı soraştırmadıq. Öyle devam etse, biz daa bir yıl bu işni baqacamız», – dep izaatladı.

Rusiyeniñ Qırım işğalinden soñ yarımadada 2014 senesi fevral 26-da Ukraina topraq bütünliginiñ tarafdarları mitinginde iştirak etken qırımtatar faallerini mahkeme etmege başladılar. Olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Rus birligi» firqasınıñ faalleri çıqqan edi.

Rusiye mahkemesiiyül 20-de mahkemeniñ qapalı toplaşuvında «fevral 26 işini» ekige böldi: ayırda – Qırımtatar Milliy Meclis reisiniñ muavini Ahtem Çiygoznıñ işi, ve ayırda – diger mabuslar AliAsanov be Mustafa Degermenciniñ işini alıp bara.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG