Link açıqlığı

Saatnıñ esas haberi

Yaqalanğan Marlen Mustafayevniñ işi boyunca mahkeme salı kününe tain etildi


Marlen Mustafayev
Marlen Mustafayev

Qırımda fevral 21 künü saat 15.00, Kreml nezaretindeki Aqmescitteki Kiyev rayon mahkemesinde, salı künü saba tintilgen Marlen Mustafayevniñ işi boyunca mahkeme toplaşuvı olıp keçecek. Bunı Qırım.Aqıqatqa Radio Svoboda muhbiri bildire.

Mustafayevni Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlaylâr. Buña sebep – 2014 senesi iyül ayında «Vkontakte» ağında Hizb ut-Tahrir teşkilâtınıñ timsalinen beraber yerleştirilgen yazı oldı.

Marlen Mustafayevniñ advokatı Emil Kurbedinov olacaq.

Qırımda, Aqmescitniñ Boğurça qasabasında, fevral 21 künü saba, Rusiyeniñ silâlı hızmetleri, Marlen Mustafayevniñ evinde tintüv ötkerdiler.

Marlen Mustafayevni desteklemek içün kelgen 10 insandan ziyade yaqalanğanı aqqında haber etilgen edi. İnsanlarnı yaqalamazdan ögne, politsiya hadimleri megafondan toplaşqanlar kütleviy tetbirler aqqında qanunnı bozğanlarını seslendirdiler.

Rusiye silâlı hızmetleri Boğurçada ötkergen areketlerini izaatsiz qaldıralar.

Ukraina Tışqı işler nazirligi defalarca zapt etilgen Qırımda Ukraina vatandaşlarına qarşı basqı ve taqip areketleri yapılğanınen raatsız olğanını bildire edi, ondan da ğayrı Rusiyeni yerli sakinlerge basqını toqtatqanını ve ukrainalı siyasiy mabuslarını azat etilmege çağıra edi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG