Link açıqlığı

Uquq qoruyıcılar Qırım advokatları Kürbedinov ve Semedlâyevden alğan tehnikanı keri qaytarmağa vade ete


Advokat Edem Semedlâyev

Qırımdaki Ekstremizm ile küreş merkeziniñ hadimi Qırım advokatları Emil Kürbedinov ve Edem Semedlâyevniñ ofisinden çıqarılğan tehnikalarını qaytarmağa vade etti. Advokatlarnıñ sorğusı ötkerilmeycektir. Bunı Radio Svoboda jurnalisti Anton Naumlük Facebook saifesinde bildirdi.

«Edem Semedlâyev ve Emil Kürbedinovnıñ sorğusı bugün olmaycaq. E Merkeziniñ hadimi ofislerinden alınğan tehnika mevzusında soraştıracağını bildirip, onı qaytarmağa vade etti. Yarın», – dep yazdı Naumlük.

Fevral 15-de Emil Kürbedinov ve Edem Semedlâyev Qırımdaki Rusiye Ekstremizm ile küreş merkezinden celpname aldılar.

Advokatlar «E Merkezine» angi iş boyunca çağırılğanını bilmey edi. Yanvar 26 künü Rusiye silâlı hızmetleri Emil Kürbedinovnıñ ofisi ve evinde tintüv keçirdiler. Tintüv devamında bütün tehnika alınğan edi.

Advokat Emil Kürbedinov yanvar 26 künü Bağçasarayda Rusiyeniñ silâlı hızmetleri tarafından yaqalandı. O qırımtatar faali Seyran Saliyevniñ evine, adliyeviy yardım bermek içün kete edi. Aqmescitniñ Demiryol rayon mahkemesi advokat Emil Kürbedinovnı Memuriy qanun bozuvları Kodeksiniñ 20.3 maddesi (Natsist timsalleriniñ teşviqatı ve açıq numayışı) boyunca qabaatlı olaraq tanıdı ve 10 künge apis etti. Bunıñ sebebi – Kürbedinov «Vkontakte» saifesinde 2013 senesi Aqmescitte «Hizb ut-Tahrir» mitingi aqqında yazını paylaşqanı oldı.

Kürbedinov siyasiy davalarnı baqqan eñ eyi Qırım advokatlarından birisidir. O ve zenaatdaşları apiske alınmasını advokat faaliyetine keder etmek ıntıluvı olaraq tanıylar.

XS
SM
MD
LG