Link açıqlığı

Ukraina Qırımnı qaytarmaq içün elinden kelgenini yapacaq – Çernış


Ukraina vaqtınca işğal etilgen topraqlar ve memleket içinde köçip kelgenlerniñ meseleleri naziri Vadim Çernış

Ukraina devleti Rusiye tarafından işğal etilgen Qırımnı qaytarmaq içün elinden kelgenini yapacaq, dep bildirdi fevral 15-de Radio Svoboda yayınında vaqtınca işğal etilgen topraqlar ve memleket içinde köçip kelgenlerniñ meseleleri naziri Vadim Çernış.

«Qırım Rusiye Federatsiyası tarafından işğal etilgen topraqnıñ ayırılmaz bir parçası ola. Ukraina Qırımnı devletniñ kontroli altına qaytarmaq içün elinden kelgenini yapacaq», – dep ayttı Çernış, Rusiye Federatsiyasınıñ Beyaz Saraynıñ Qırım ile bağlı baqışlarına bergen cevabını izaatlap.

Onıñ aytqanına köre, Ukraina Tışqı işler nazirligi Rusiye nazirligine Moskvanıñ Qırımnı Ukrainağa qaytarmağa istemegeninen bağlı narazılıq bildirecek.

Nazirniñ qayd etkenine köre, al-azırda Qırımnıñ işğalden azat etilmesine dair bir qaç vesiqa bar, olar Ukraina devlet akimiyeti organlarınıñ işini belgilemekte.

«Ükümet, baş nazir, baş nazir muavininiñ avaleleri ve sıñırlağan vesiqalardır», – dep qayd etti Çernış. O, mezkür vesiqalar esasen havfsızlıq ve mudafaa, yayın ve medeniy miras ile bağlı olğanını qoştı.

Rusiye Tışqı işler nazirliginiñ resmiy vekili Mariya Zaharov Rusiye Qırımnı Ukrainağa qaytarmaycağını ayttı. O, Beyaz Saraynıñ AQŞ prezidenti Donald Trump Rusiyeden Qırımnıñ Ukrainağa qaytarmasını beklegenine dair beyanatını böyle etip izaatladı.

Beyaz saray matbuat kâtibi Sean Spicer AQŞ prezidenti Donald Trump Rusiyeden Qırımnıñ Ukrainağa qaytarmasını ve Ukraina şarqındaki zorbalıq toqtatmasını bekley, dep bildirdi.

Ukraina prezidentiniñ memuriyeti AQŞ prezidenti Donald Trumpnıñ işbu beyanatına müsbet qıymet kesti.

Fevral 15-de Rusiye prezidentiniñ matbuat kâtibi Dmitriy Peskov AQŞ ve Rusiye prezidentleri Donald Trump ve Vladimir Putin telefonda subetleşip, Qırım meselesini muzakere etmediler, dep bildirdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG